ނޭޕާލްގައި ފެންބޮޑުވެ، ބިންގަނޑު ކަނޑައިގެން ދިއުމާއި ގުޅިގެން ލިބުނު ގެއްލުންތަކުގައި އެތައް ބަޔަކު މަރުވެ، އަދި ބައެއް މީހުން ވަނީ ގެއްލިފަ އެވެ.
އެމަނިކުފާނު އެކްސްގައި ކުރެއްވި ޕޯސްޓެއްގައި ވަނީ، މެދުކެނޑުމެއްނެތި ބޯކޮށް ވާރޭވެހުމުން ފެންބޮޑުވެ، ބިންގަނޑު ކަނޑައިގެން ދިއުމުގެ ސަބަބުން އެގައުމުގެ އެތައް ރައްޔިތުންނެއްގެ ފުރާނަ ގެއްލުނު ޚަބަރު އަޑުއެއްސެވީ ފުން ހިތާމައާއެކު ކަމަށެވެ.
އަދި އެމަނިކުފާނުގެ ދުއާ އަކީ ގެއްލުނު މީހުން އަވަހަށް ފެނި، އަނިޔާ ލިބުނު ފަރާތްތަކަށް އަވަސް ޝިފާއެއް ލިބުންކަމަށް ރައީސް ވިދާޅުވި އެވެ.
ރައީސްގެ މެސެޖުގައި ވިދާޅުވީ މި ދަތި ދަނޑިވަޅުގައި ދިވެހި ސަރުކާރާއި ދިވެހި ރައްޔިތުން ތިބީ ނޭޕާލް ރައްޔިތުންނާއެކުކަމަށެވެ.
މި އަހަރުގެ މިހާތަނަށް ނޭޕާލަށް ބޯކޮށް ވާރޭވެހި، ފެންބޮޑުވުމުގެ އެކި ހާދިސާތަކުގައި 220 މީހުން މަރުވެފައިވާ ކަމަށް ޑިޒާސްޓާ އޮތޯރިޓީގެ ތަފާސްހިސާބުތަކުން ދައްކަ އެވެ. ނޭޕާލްގައި އާންމުކޮށް ވިއްސާރަ މޫސުން ޖޫން މަހު ފެށޭއިރު، ނިމޭނީ ސެޕްޓެމްބަރު މަހު މެދުތެރޭގައެވެ.
ޖޫން މަހުގެ މެދުތެރޭގައި ނޭޕާލްގެ ވިއްސާރަ މޫސުން ފެށުނު ފަހުން ހިނގާފައިވާ ބިންގަނޑު ކެނޑުމާއި ކިސަޑު ފޭބުމުގެ ހާދިސާތަކުގައި މަރުވި މީހުންގެ އަދަދު ވަނީ 254 އަށް އުފުލިފަ އެވެ. އަދި, 65 ގެއްލިފައިވާ ކަމަށް އެ ގައުމުގެ އިދާރާތަކުން ހާމަކުރި އެވެ.
