އަލް ޖަޒީރާއިން ރިޕޯޓުކޮށްފައިވާ ގޮތުގައި ޔަހޫދީ ފައުޖުތަކުން ބޮން އަޅާފައިވަނީ ދެއިރް އަލް ބަލާހްގައި ހުންނަ "ޝަހާދާ އަލް އަޤްޟާ" ނަމަކަށް ކިޔުނު މިސްކިތަކަށެވެ.
މި މިސްކިތަށް އަމާޒުކޮށް ބޮން އެޅުމަށްފަހު އިސްރާއީލުން ބުނެފައިވަނީ އެ މިސްކިތް ބޭނުންކުރަމުންދިޔައީ ހަމާސްގެ ކޮމާންޑު ސެންޓަރެއްގެ ގޮތުގައި ކަމަށެވެ.
ޔަހޫދީ ފައުޖުތަކުން ބަހަނާ ދައްކައި، ބޮންއަޅާ ސުންނާފަތި ކޮށްލި އެ މިސްކިތަކީ ޣައްޒާގައި ހާލުގައި ޖެހިފައިވާ އާއިލާތަކަކުން ބޯހިޔާވަހިކަމުގެ ގޮތުގައި ބޭނުންކުރަމުންދިޔަ މިސްކިތެކެވެ.
މި ހަމާލާތައް ދިނުމަށް ފަހު އިސްރާއީލުން ބުނެފައިވަނީ ހަމަލާ ދިނުމުގެ ކުރިން އާންމުންގެ ރައްކާތެރިކަމަށްވެސް ބެލި ކަމަށެވެ.
ޔަހޫދީ ފައުޖުތަކުން ފަލަސްތީނުގެ ނަސްލު ނައްތާލުމަށް ކުރަމުން އަންނަ މި ހަނގުރާމައިގައި ގާޒާގެ %79 މިސްކިތް ވަނީ ނައްތާލާފަ އެވެ. ގާޒާގެ 1،245 މިސްކިތުގެ ތެރެއިން 814 މިސްކިތް ހަލާކޮށްލާފައި ވާއިރު، 148 މިސްކިތަކަށް ވަނީ ބޮޑެތި ގެއްލުންތަކެއް ދީފަ އެވެ.
އިޒްރޭލުން މިވަގުތު ވެސް ދަނީ، ފަލަސްތީނުގެ ހައްގުގައި މަސައްކަތްކުރާ ހަނގުރާމަވެރި ޖަމާއަތް ހިޒްބުﷲ އާ ދެކޮޅަށް ލުބްނާނަށް ވެސް އެއްގަމާއި ވައިގެ މަގުން ހަމަލާތައް ދެމުންނެވެ.
މިދިޔަ އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން ހަމާސް ނައްތާލުމުގެ ނަމުގައި އިޒްރޭލުން ފަލަސްތީނުގެ އެކި ސަރަހައްދުތަކަށް ދެމުންދާ ހަމަލާތަކުގައި މިހާތަނަށް 41500 އަށް ވުރެ ގިނަ ފަލަސްތީނުގެ ރައްޔިތުން ވަނީ ޝަހީދުވެފަ އެވެ.
