މި މަޝްވަރާތައް ކުރިއަށް ދިޔައީ ރައީސް ޑރ. މުހައްމަދު މުއިއްޒު އިންޑިއާއަށް ކުރައްވަމުންގެންދަވާ ރަސްމީ ދަތުރުފުޅުގައި، އިންޑިއާގެ ބޮޑުވަޒީރު ނަރެންދުރަ މޯދީ އާއެކު ބޭއްވެވި މަޝްވަރާތަކުގައެވެ.
އިންޑިއާގެ ބޮޑުވަޒީރު މޯދީ ވިދާޅުވި ގޮތުގައި މި ދެ ކޮންސިއުލޭޓު ގާއިމުކުރުމުގެ ސަބަބުން ދެ ގައުމުގެ ރައްޔިތުންގެ މެދުގައި އޮންނަ ގުޅުން އިތުރަށް ވަރުގަދަވެގެންދާނެއެވެ. އައްޑޫގައި އިންޑިއާގެ ކޮންސިއުލޭޓެއް ގާއިމުކުރުމަށް އިންޑިއާގެ ކެބިނެޓުން ފާސްކޮށްފައިވަނީ 2021 ވަނަ އަހަރުގައެވެ. ނަމަވެސް، އޭރުގެ ދިވެހި ސަރުކާރުން އެކަމަށް ބޭނުންވާ ހުއްދަ ނުދިނުމުގެ ސަބަބުން އެކަން ވަނީ މަޑުޖެހިފައެވެ.
މީގެ އިތުރުން، ދިވެހި ސިފައިންގެ ގާބިލުކަން އިތުރުކުރުމަށް އިންޑިއާއިން ދޭ އެއްބާރުލުން އިތުރުކުރާނެ ކަމަށާއި، ދިފާއީ ގޮތުން ތަފާތު ގިނަ ދާއިރާތަކުން ރައީސް މުއިއްޒާ އެކު މަޝްވަރާތައް ކުރައްވާފައިވާނެ ކަމަށްވެސް މޯދީ ވިދާޅުވިއެވެ. މިކަމަކީ ދެ ގައުމުގެ ސަލާމަތީ އަދި ދިފާއީ ގުޅުން އިތުރަށް ހަރުދަނާކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.
