އެކަމާ ގުޅިގެން އީޕީއޭ އިން މިއަދު ނެރުނު ބަޔާނުގައި، ހިމާޔަތްކޮށްފައިވާ ދިރުންތަކުގެ މުހިއްމުކަން ބަޔާންކޮށް، ގަވައިދާ ހިލާފު ކަންކަން ފާހަގަކޮށްފައިވެ އެވެ.
އެގޮތުން، އެ އެޖެންސީގެ ކަންބޮޑުވުންތަކުގެ ތެރޭގައި ހިމެނެނީ، ހިމާޔަތްކޮށްފައިވާއި ދިރުންތައް ހިފާ ގެންގުޅުމާއި އެތަކެތި މަރުމާ ކެއުމުގެ އިތުރުން ތަކެތީގެ ބައިތަކުގެ ވިޔަފާރި ކުރުމެވެ. އަދި، ވެލާ ކަހަނބު ހިފުމާއި ހިމާޔަތްކޮށްފައިވާ ދޫނި ސޫފާސޫފީގެ ބާވަތްތައް އޮޅު ޖަނަވާރުންގެ ގޮތުގައި ގެންގުޅުން ހިމެނެ އެވެ.
ރާއްޖޭގެ "ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނު"ގެ ދަށުން ބާރުދޭ "ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާ ބެހޭ ގަވައިދު"ން ވަނީ ރާއްޖޭގެ މާހައުލުން ފެންނަ މުހިއްމު ދިރުންތަކެއް ރައްކާތެރިކޮށް، ގާނޫނީ ގޮތުން ހިމާޔަތްދީފަ އެވެ. އެގޮތުން ހިމާޔަތްކޮށްފައިވާ ބާވަތްތަކުގެ ތެރޭގައި:
ފަސް ބާވަތެއްގެ ވެލާ ކަހަނބު
އެއް ބާވަތުގެ ކަންޒު ކަހަނބު
207 ބާވަތުގެ ދޫނި
ރާއްޖޭގެ ސަރަހައްދުން ފެންނަ ހުރިހާ ބާވަތެއްގެ މަޑި
ފެހުރިހި
އީޕީއޭއިން ބުނާ ގޮތުގައި، ހިމާޔަތްކޮށްފައިވާ ދިރުންތަކަކީ ފަތުރުވެރިކަމުގައި މުހިންމު ދައުރެއް އަދާކުރާ ދިރުންތަކެއް ކަމަށާއި ނޭޗާ ޓުއަރިޒަމްގެ ފަހަތުގައިވާ އެއް ސަބަބު ކަމަށެވެ.
ކަން މިހެން ހުރުމާ އެކު، ހިމާޔަތްކޮށްފައިވާ ދިރުންތަކަށާއި އެތަކެތީގެ މާހައުލަށް ގެއްލުން ލިބޭ ކަންކަން ތަކުރާރުވެ، އިތުރުވަމުންދާތީ، އީޕީއޭއިން ވަނީ އެކަމާ ހިތާމަ ފާޅުކޮށްފަ އެވެ. ނަމަވެސް އެކަމާ ގުޅިގެން އެއްވެސް ފިޔަވަޅެއް އަޅާނެ ވާހަކަ އީޕީއޭގެ ބަޔާނުގައި ނެތެވެ.
