ކޮންމެ ފަރުމަހުގެ ޝިޕްމަންޓަކާ އެކު ކެޗް ސެޓުފިކެޓެއް އޮތުން ލާޒިމުކުރެވޭނެ ކަމަށް ފިޝަރީޒް މިނިސްޓްރީން ބުނެފައިވާއިރު ކެޗް ސެޓުފިކެޓު ދޫކުރުމުގެ ނިޒާމު މެދުވެރިކޮށް އެކްސްޕޯޓުކުރާ ފަރުމަހުގެ ބާވަތްތައް ބާނައިފައިވާ އުޅަނދުގެ މައުލޫމާތާއި، މަސް ބޭނި ތާރީހު އަދި މަސް ޕްރޮސެސްކުރި ފަރާތުގެ މައުލޫމާތު އެއްކުރެވޭނެ ކަމަށް އެ ފަރާތުން ބުނެއެވެ.
އޭގެއިތުރުން އެ މައުލޫމާތުގެ އަލީގައި މަސް ބޭނީއްސުރެ މަހާއި މަހުގެ އުފެއްދުންތައް ގަންނަ ފަރާތްތަކަށް ފޯރުކޮށްދެވެންދެން އެއުފެއްދުންތައް ކަޑައްތުކޮށްފައިވާ އެންމެހައި މަރުހަލާތައް، ދެނެގަތުމަށް ޓްރޭސަބިލިޓީ ޔަގީންކުރުމަށް މަގުފަހިވެގެންދާނެކަމަށްވެސް ފިޝަރީޒް މިނިސްޓްރީން ބުނެއެވެ.
ގާނޫނާ ހިލާފަށް ރިޕޯޓުކުރުމެއް، އަދި ބެލެހެއްޓުމެއް ނެތި ކުރާ އިލީގަލް (އަންރެގިއުލޭޓަޑް އެންޑް އަންރިޕޯޓެޑް - އައި.ޔޫ.ޔޫ) މަސްވެރިކަން ހުއްޓުވުމަށާއި،ރާއްޖޭގެ މަސްވެރިކަމުގެ ވިޔަފާރީގައި ބަދަލުކުރެވޭ މަހާއި މަހުގެ އެންމެހައި އުފެއްދުންތަކަކީ ހަރުދަނާ ނިޒާމެއްގެ ތެރެއިން ބެލެހެއްޓިފައިވާ މަސްވެރިކަމަކުން ބާނައި، ތައްޔާރުކޮށްފައިވާ އުފެއްދުންތަކެއްކަން ކަށަވަރުކުރުމަށްޓަކައި ކެޗް ސެޓުފިކެޓު ދޫކުރުމުގެ ނިޒާމެއް ގާއިމުކުރުމަކީ މުހިންމު ފިޔަވަޅެއް ކަމަށް ފިޝަރީޒް މިނިސްޓްރީން ބުނެއެވެ.
