މި މައްސަލާގައި ހުކުމްކޮށްފައިވަނީ ލ އަތޮލަށް ނިސްބަތްވާ މީހަކަށެވެ.
މި މައްސަލާގައިވާ ގޮތުން މި މިހާ 2009 ވަނަ އަހަރުން ފެށިގެން 2021 އޮކްޓޫބަރުގެ ނިޔަލަށް އެކިފަހަރު މަތިން އޭނާގެ އެއްބަނޑު އެއްބަފާ މީހެއްގެ ދަރިއަކަށް ޖިންސީ ގޯނާކުރިއެވެ. މި މައްސަލާގައި މީނާގެ މައްޗަށް އިތުބާރު ކުރެވޭ މަގާމެއްގައި ހުރެ ކުޑަކުއްޖަކާ މެދު ޖިންސީ އަމަލެއް ހިންގުމުގެ ދައުވާކުރިން ކުރިއެވެ. އެހެންނަމަވެސް އެ މައްސަލަ އެ ރަށު މެޖިސްޓްރޭޓްކޯތުން ބަލާ ނިންމާފައިވަނީ ކުށް ސާބިތުނުވާކަމަށެވެ.
ދައުލަތުން މި މައްސަލަ އިސްތިއުނާފުކުރުމުން މައްސަލަ ނިންމާ ހައިކޯޓުން އިއްވި ހުކުމުގައިވަނީ އެ ކުއްޖާ ނިދާފައި އޮއްވައި އެ ކުއްޖާގެ ގައިގައި އަތްލާ ހަދާފައިވާކަމަށެވެ. އަދި މީގެ އިތުރުން އެ ކުއްޖާއަށް ބަރަހަނާ މަންޒަރު ހިމެނޭ ވީޑިއޯއެއް ދެއްކިކަމަށްވެސް އެ ހުކުމްގައިވެއެވެ.
އެ މީހާގެ ދިފާއުގައި އޭނާގެ އަނބިމީހާގެ އިތުރުން އިތުރު ބަޔަކު ހެކިބަސް ދިން ނަމަވެސް، އެ މީހުންގެ ބަހަށް ބާރު ދޭނެ އިތުރު ހެއްކެއް ނެތުމުން އެ މީހުންގެ ހެކިބަސް އެއްފަރާތް ކުރަން ޖެހޭކަމަށްވެސް ހުކުމުގައިވެއެވެ. އެ ކުއްޖާގެ ބަހަށް ބާރު ދޭނެ ހެކިތައް ހުރިއިރު ކުއްޖާއަށް ލިބުނު ޖިންސީ ގޯނާގެ ސަބަބުން އެ ކުއްޖާއަށް ނަފްސާނީ ގޮތުން އަސަރުކޮށްފައިވާކަމަށް ހެކިތަކުން ފެންނަން ހުރިކަމަށްވެސް ހުކުމްގައިވެެއެވެ.
މީމީހާގެ މައްޗަށް ކުށްސާބިތުނުވާކަމަށް މެޖިސްޓްރޭޓް ކޯޓުން އިއްވި ހުކުމް ހައިކޯޓުން ވަނީ ބާތިލުކޮށްފައެވެ. އަދީ އެމީހާގެ މައްޗަށް 15 އަހަރު ދުވަހުގެ ޖަލު ހުކުމެއް ވަނީ އިއްވާފައެވެ. އެހެންނަމަވެސް އެމީހާ ބަންދުގައި ހުރު މުއްދަތު ކެނޑުމުން ޖަލުގައި ހުންނަން ޖެހޭނީ 14 އަހަރަށެވެ.
