މަސްވެރިކަމާ ބެހޭ ވުޒާރާއިން ބުނީ މަސްވެރިކަމުގައި އަމަލީގޮތުން ބައިވެރިވާ، އާމްދަނީ ހޯދުމަށް މަސްވެރިކަން ފިޔަވައި އިތުރު ކަމެއް ނުކުރާ އެންމެ ހިދުމަތްތެރި (35 އަހަރުން ދަށް) ކެޔޮޅަކާއި އަދި އެންމެ ތަޖުރިބާކާރު (35 އަހަރުން މަތި) ކެޔޮޅު ހޮވައި، އެ ދެ ފަރާތަށް ހިތްވަރުދިނުމުގެ ގޮތުން އެވޯޑެއް ދިނުމަށް ހަމަޖެހިފައިވާ ކަމަށެވެ.
މީގެއިތުރުން އާމްދަނީ ހޯދުމަށްކުރާ މައިގަނޑު މަސައްކަތަކަށް ފަރުމަހުގެ މަސްވެރިކަން ކުރާ ހިދުމަތްތެރި ފަރުމަސްވެރިޔާގެ އެވޯޑުވެސް ދިނުމަށް ނިންމާފައިވާކަމަށް ފިޝަރީޒް މިނިސްޓްރީން ބުނެއެވެ.
މި ތިން އެވޯޑަށް ކުރމަތި ލުމުގެ ފުރުސަތު މިނިސްޓްރީން ވަނީ ހުޅުވާލައެވެ. މި އެވޯޑަށް ޝަރުތު ހަމަވާ ފަރާތްތަކަށް އެވޯދަށް ކުރިމަތިލުމުގެ ފުރުސަތު އަންނަ ނޮވެމްބަރު މަހުގެ 7 ވަނަ ދުވަހާއި ހަމައަށް ވަނީ ހުޅުވާލާފައެވެ. އެވޯޑަށް ކުރިމަތިލުމަށް ހުށައަަންޖެހޭނީ އެކަމަށް ހާއްސަކޮށްފައިވާ ފޯމުންކަމަށާއި އެ ފޯމު މިނިސްޓްރީގެ ވެބްސައިޓުން ޑައުންލޯޑް ކުރެވެން ހުންނާނެ ކަމަށްވެސް ފިޝަރީޒްއިން ބުނެއެވެ.
މީގެ އިތުރުން މި ދެ އެވޯޑަށް އެދި އަމިއްލަ ހައިސިއްޔަތުން ނުވަތަ އެހެން މީހެއްގެ ނަން ހުށަހެޅުމުގެ ފުރުސަތު އޮތްކަން އެ ވުޒާރާއިން ވަނީ ފާހަގަކޮށްފަ އެވެ. އެވޯޑަށް އެދި ހުށަހަޅާ ފޯމް މިނިސްޓްރީގެ އީމެއިލް [email protected] އަށް ފޮނުވުމަށް މަސްވެރިކަމާ ބެހޭ ވުޒާރާއިން ވަނީ އެދިފަ އެވެ.
މި އެވޯޑްތައް ދިނުން އޮންނާނީ މަސްވެރިންގެ ދުވަހާއި ގުޅިގެން ބާއްވާ ރަސްމީ ޖަލްސާގައެވެ.
