މި ގްރާންޓް ދޫކުރީ ގްލޯބަލް އެންވަޔަރަންމަންޓް ފެސިލިޓީ (ޖީއީއެފް) ގެ ދަށުންނެވެ.
އެންވަޔަރަންމަންޓް މިނިސްޓްރީން ބުނި ގޮތުގައި މި ގްރާންޓްގެ ދަށުން ލ. ގަމުގެ ޕަރީފެންގަނޑާއި، މާބައިދޫގެ ކޯރު ސަރަހައްދާއި، ހިތަދޫ ކުޅި ސަރަހައްދު ތަރައްގީކުރުމަށް ކޮންމެ ރަށަކަށް ދެ މިލިއަން ރުފިޔާގެ ހިލޭ އެހީ ދީފައިވެއެވެ. މި ފައިސާ ބޭނުންކުރާނީ ހިމާޔަތްކޮށްފައިވާ ސަރަހައްދުތަކަށް ތައްޔާރުކޮށްފައިވާ މެނޭޖްމަންޓް ޕްލޭން ތަންފީޒުކުރުމަށެވެ.
ލ. ފޮނަދޫގައި ބޭއްވި ރަސްމިއްޔާތެއްގައި މި ގްރާންޓްތައް ހަވާލުކުރެވުނެވެ. މި ރަސްމިއްޔާތުގައި އެންވަޔަރަންމަންޓް މިނިސްޓަރު އިބްރާހިމް ތޯރިގް ވިދާޅުވީ މި ގްރާންޓްތަކަކީ މި ސަރަހައްދުތަކުގެ ފައިދާ ފުރިހަމަ ގޮތުގައި ހިފުމަށް ލިބުނު ފުރުސަތެއް ކަމަށެވެ. އަދި މި ގްރާންޓްތައް ރަނގަޅަށް ބޭނުންކޮށްފިނަމަ މިފަދަ އެހެން ގްރާންޓްތަކާއި މަޝްރޫއުތަކަށް ފުރުސަތު ހުޅުވޭނެ ކަމަށްވެސް މިނިސްޓަރު ވިދާޅުވިއެވެ.
މި ތިން ސަރަހައްދު ހިމެނޭހެން ލ. އަތޮޅުގެ ޖުމުލަ ހަ ސަރަހައްދެއް ހިމާޔަތްކޮށްފައިވަނީ 2021 ވަނަ އަހަރުގެ ޑިސެންބަރު މަހުގެ ތެރޭގައެވެ. މީގެ އިތުރުން، މި ގްރާންޓްގެ ދަށުން އައްޑޫ އާއި ފުވައްމުލަކުގެ ނޭޗާ ޕާކު މަރާމާތުކުރުމަށް ސަރުކާރުން އެމްއޯޔޫއެއްގައި ވެސް މިދިޔަ ހަފުތާގައި ސޮއިކޮށްފައިވާކަން ފާހަގަކުރެވެއެވެ.
