މި މައްސަލާައި ދައުވާކޮށްދިނުމަށް އެދި އޭސީސީން ޕީޖީ އޮފީހަށް ފޮނުވާފައިވަނީ 2018 ވަނަ ހައުސިން މިނިސްޓްރީގެ ނައިބަކަށް ހުންނެވި ނާއިފު ޝައުކަތާއި އެ މިނިސްޓްރީގެ ކޯޑިނޭޓަރަކަށް ހުރި ހަސަން ވަހީދުގެ މައްޗަށެވެ.
އޭސީސީން ނެރުނު ބަޔާނެއްގައި ބުނީ އެމީހުންގެ މައްޗަށް ދައުވާކޮށްދިނުމަށް އެދިފައިވަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކޮށްގެން ނާޖައިޒު ފައިދާ ހޯދާދިނުމުގެ ކުށުގެ ދައުވާކަމަށެވެ.
މި މައްސަލާގައި އެ ގޯތުން ދައުލަތަށް ލިބުނި ބިމާއި އިންވެގެން އޮތް ބިމުގެ ވަރު ފަރާތުން އެ ބިން ގަތުމަށް އެދުނުނަމަވެސް އެ ބިން ވިއްކާފައިވަނީ އެ ބިމާއި ދުރުގައި އޮތް ބިމުގެ ވެރި ފަރާތްތައް ކަމަށް އޭސީސީން ނެރުނު ބަޔާނުގައިވެއެވެ. އަދި އެ ނިންމުން އެގޮތަށް ނިންމާފައިވަނީ އޭރު އަމަލުކުރަމުންދިޔަ "ވެށިފަހި މާލެ ޕްރޮގްރާމްގެ ދަށުން ދައުލަތަށް މިލްކުވެފައިވާ ވިންތައް ވިއްކުމާއި ބެހޭ އުސޫލް" އާއި ހިލާފަށްކަމަށްވެސް އޭސީސީން ބުނެއެވެ.
މީގެއިތުރުން އެ އުސޫލުގައި ބިން ވިއްކުމުގެ ކުރިން ގޯތީގެ ބެހެނިވެރިންނާއި ވާރިސުންގެ ދިރިއުޅުމުގެ ހާލަތު ވަޒަންކުރަންޖެހޭނެކަމަށް ބަޔާންކޮށްފައި އޮތް ނަމަވެސް އެ ބިން ގަތުމަށް ހުށައެޅި ދެ ފަރާތުގެ ދިރިއުޅުމުގެ ހާލަތު ވަޒަންކޮށްފައި ނުވާކަން ތަހުގީގަށް ހޯދިފައިވާ ހެކިތަކުން އެނގޭކަމަށްވެސް އޭސީސީން ބުނެއެވެ. އަދި އެކަން ކޮށްފައިވަނީ ބިން ވިއްކި ފަރާތަށް ނާޖައިޒި ފައިދާއެއް ހޯދާދިނުމުގެ ބޭނުމުގައިކަންވެސް ތަހުގީގަށް އެނގިފައިވާކަމަށް އޭސީސީން ބުނެއެވެ.
ހައުސިން މިނިސްޓްރީގެ ނައިބުގެ މަގާމުގައި ނާއިފު ޝައުކަތު އަދި އެ މިނިސްޓްރީގެ ކޯޑިނޭޓަރުކަމުގެ މަގާމުގައި ހަސަން ވަހީދު ހުރީ ރައީސް ޔާމީން ވެރިކަމުގައެވެ.
