މިކަމާ ގުޅޭ މައުލޫމާތު ހާމަކުރުމަށް ކުރިން ދެކޮޅު ހަދަމުން އައި ސަރުކާރުން މިހާރު ވަނީ އެ މައުލޫމާތު ހާމަކުރަން ނިންމާފައެވެ.
މި މައްސަލައިގައި ކުރިން ޑިފެންސް މިނިސްޓްރީން ވަނީ މައުލޫމާތު ހާމަނުކުރަން ނިންމާފައެވެ. އެހެންނަމަވެސް އިންފޮމޭޝަން ކޮމިޝަނަރު އެ މައުލޫމާތު ހާމަކުރުމަށް އެންގެވުމާ ގުޅިގެން، ޑިފެންސް މިނިސްޓްރީން މި މައްސަލަ ހައި ކޯޓަށް ހުށަހެޅިއެވެ. އެހެންނަމަވެސް މިހާރު ވަނީ އެ މައްސަލަ އަނބުރާ ގެންގޮސް، މައުލޫމާތު ހާމަކުރަން ނިންމާފައެވެ.
މީގެ ކުރިން ޑިފެންސް މިނިސްޓްރީން މި މައުލޫމާތު ހާމަނުކުރަން ނިންމީ މައުލޫމާތު ހޯދައި ލިބިގަތުމުގެ ގާނޫނުގެ 29 ވަނަ މާއްދާއަށް ހަވާލާދީއެވެ. އެ މާއްދާގައި ވަނީ ގައުމީ ސަލާމަތަށް ނުރައްކާވެދާނެ ފަދަ މައުލޫމާތު ސިއްރު ކުރުމުގެ ފުރުސަތު އޮންނާނެ ކަމަށެވެ.
މި މައްސަލައިގައި ހާމަކުރަން އެދިފައިވާ މައުލޫމާތުގެ ތެރޭގައި ހިމެނެނީ ދިވެހި ސިފައިން އަސްކަރީ މަތިންދާބޯޓުތައް ދުއްވާތޯ އާއި ޑޯނިއާ ދުއްވުމުގައި ދިވެހި ޕައިލެޓުންގެ ބައިވެރިވުން ނެތް ސަބަބެވެ. އަދި އެ ޕައިލެޓުން ސިފައިންގެ ވަޒީފާއިން ވަކިވެފައިވާނަމަ އެކަމާ ގުޅޭ މައުލޫމާތު ވެސް ހިމެނެއެވެ. މި މައުލޫމާތު ހާމަކުރުމަށް ނިންމުމާ ގުޅިގެން، ކުރިއަށް އޮތް ތަނުގައި މި މައުލޫމާތު އާންމުންނަށް ލިބޭނެ ކަމަށް ބެލެވެއެވެ.
