އެ ހޮސްޕިޓަލުން މިގޮތަށް ބަދަލު މި ގެނައީ ވަނީ "މާބަނޑު އަަންހެނުންނަށާއި ޅަދަރިމައިންނަށް ފްލެކްސިބަލް ޑިއުޓީ ހަމަޖައްސައިދިނުން ހުއްޓާލުމާ" ގުޅޭގޮތުން ނެރެފައިވާ އިންޓާނަލް މެމޯއާ ގުޅޭގޮތުން ހުރި ކަންބޮޑުވުންތަކާއި ގުޅިގެން ނެރުނު ބަޔާނެއްގަ އެވެ،
މެނޭޖްމަންޓުން ގެނައި ބަދަލުތަކުގެ ސަބަބުން ހޮސްޕިޓަލްގައި މަސައްކަތް ކުރާ ގިނަ މުވައްޒަފުންގެ ކަންބޮޑުވުންތައް ހުރިކަމަށް މެނޭޖްމަންޓް ހިއްސާކޮށްފައިވާތީ އެ ކަންބޮޑުވުންތަކަށް ރިއާޔަތްކޮށް އެ އުސޫލު ކުރިންވެސް އޮތްގޮތަށް ބަދަލުކުރުމަށް މެނޭޖްމަންޓުން ނިންމާފައިވާކަމަށް އައިޖީއެމްއެޗްއިން ބުނެ އެވެ.
އެގޮތުން ކުރިން ނެރުނު މެމޯގައި ފްލެކްސިބަލްކޮށް މަސައްކަތް ކުރުން އެއްކޮށް ހުއްޓާލެވިފައިވާކަމަށް ދޭހަވާފަދަ ގޮތަކަށް އިބާރާތް ކުރެވިފައި ވީނަމަވެސް، މާބަނޑު މީހުންނަށް މިހާރުވެސް ދެމުން ގެންދާ ލުއިތަކަށް އެއްވެސް ބަދަލެއް ގެނެވިފައިނުވާކަން އައިޖީއެމްއެޗްއިން އެންމެ ފަހުން ނެރުނު ބަޔާނުގައި ފާހަގަކުރެ އެވެ.
އައިޖީއެމްއެޗްއަކީ 24 ގަޑީރު ހިދުމަތް ދޭން ޖެހޭ، ސަރުކާރުގެ މައި ހޮސްޕިޓަލަަށް ވެފައި، ޝިފްޓް ޑިއުޓީގައި މަސައްކަތް ކުރާ މުވައްޒަފުންގެ މަސައްކަތު ގަޑި ފްލެކްސިބަލް ޑިއުޓީގެ ގޮތުގައި، ކުރުމުން ހޮސްޕިޓަލުން ހިދުމަތް ހޯދާ ބަލިމީހުންނަށް އެކަށީގެންވާ ގޮތެއްގައި ހިދުމަތް ދިނުމަށް ދަތިވާތީ، މެނޭޖްމަންޓުން އުސޫލަށް ބަދަލު ގެެނެސްފައިވާކަމަށް އައިޖީއެމްއެޗްއިން ފާހަގަކުރެ އެވެ.
އެގޮތުން މެނޭޖްމަންޓް އުސޫލަށް ބަދަލު ގެނެސްފައިވަނީ ފްލެކްސިބަލް ޑިއުޓީ ދިގު މުއްދަތަކަށް ދިނުމަށް ކޮންމެވެސް ވަރެއްގެ ހަރުދަނާ ކަމެއް ގެނައުމަށްޓަކައި ފްލެކްސިބަލް ޑިއުޓީ ބޭނުންވާ މުވައްޒަފުންނަށް ހުށަހަޅުއްވާ ހާލަތްތަަކަށް ރިއާޔަތްކޮށް، އެހާލަަތްތަކާ އެކަށީގެންވާ މުއްދަތަކަށް ފްލެކްސިބަލް ޑިއުޓީ ހަމަޖައްސައިދިނުމަށް ކަމަށް އައިޖީއެމްއެޗްއިން މައުލޫމާތުދެ އެވެ.
ނަމަވެސް މެނޭޖްމަންޓުން ގެނައި ބަދަލުގެ ސަބަބުން ހޮސްޕިޓަލުގައި މަސައްކަތްކުރާ ގިނަ މުވައްޒަފުންގެ ކަންބޮޑުވުންތައް ހުރިކަމަށް މެނޭޖްމަންޓާ ހިއްސާކޮށްފައިވާތީ އެ ކަންބޮޑުވުންތަކަށް ރިއާޔަތްކޮށް، އެ އުސޫލު ކުރިންވެސް އޮތް ގޮތަށް ބަދަލުކުރުމަށް މެނޭޖްމަންޓުން ނިންމީކަމަށް އެ ހޮސްޕިޓަލުން ބުންޏެވެ.
އައިޖީއެމްއެޗުން ބުނީ ރައްޔިތުންނަށް އެ ހޮސްޕިޓަލުން ދޭ ހިދުމަތްތައް ދަތިނުވާނޭހެން މުވައްޒަފުން މަސައްކަތްކުރުމުގައި ފަސޭހަ ގޮތްތައް ހަމަޖައްސައިދީ އެކަށީގެންވާ މާހައުލެއް ގާއިމުކޮށްދިނުމަށް އަބަދުވެސް އިސްކަންދޭނެ ކަމަށެވެ.
