ރައީސް މިއަދު އެކްސްގައި އިއުލާންކުރެއްވި ގޮތުގައި ވޭޕްކުރަން ބޭނުންކުރާ ހުރިހާ ބާވަތްތަކެއް ރާއްޖެ އެތެރެކުރުމާއި ވިއްކުމާއި ގެންގުޅުން މަނާކުރުން އަޅަން ޖެހޭ ފިޔަވަޅުތައް އަޅަން މިއަދު ކަމާ ބެހޭ ފަރާތްތަކަށް ވަނީ އަންގައިފަ އެވެ.
އަދި ވޭޕްކުރާ ތަކެތި ބޭނުންކުރުމާއި ގެންގުޅުމާއި އުފެއްދުމާއި ވިއްކުމާއި އިޝްތިހާރުކުރުމާއި ހިލޭ ބެހުން އަންނަ ޑިސެމްބަރު 15 އިން ފެށިގެން މަނާކުރުމަށް ކުރަންޖެހޭ ހުރިހާ ކަމެއް ކުރުމަށް ކަމާބެހޭ ފަރާތްތަކަށް ރައީސް ވަނީ އަންގަވައިފަ އެވެ.
ރައީސް އިތުރަށް ވިދާޅުވީ މިދިޔަ އަހަރުތަކުގައި އެއްވެސް ސަރުކާރަކަށް ވޭޕް ރެގިއުލޭޓް ކުރެވިފައި ނުވާ ކަމަށާއި ޒުވާނުންނާއި ކުޑަކުދިން ވޭޕް ބޭނުންކުރާ މިންވަރު ކަންބޮޑުވާ މިންވަރަކަށް މިފަހުން އިތުރުވެފައިވާ ކަމަށެވެ. އެކަމުގެ ސަބަބުން ސިއްހީ ނުރައްކާތަކަށް ރާއްޖޭގެ އާބާދީ ހުށަހެޅެމުން އަންނަކަން ރައީސް ފާހަގަކުރެއްވި އެވެ.
ރާއްޖޭގައި ވޭޕް މަނާކުރަން ރައީސް ނިންމަވާފައިމިވަނީ ރާއްޖޭގައި ވޭޕްކުރުން ވަރަށް ބޮޑަށް އާންމުވަމުންދާތީ ވޭޕް މަނާކޮށް ދޭން ތަފާތު އެކި ޖަމިއްޔާތަކުން ގޮވާލަމުންދިޔަ ދަނޑިވަޅެއްގަ އެވެ.
ރާއްޖެއަށް ވޭޕް އެތެރެކުރުން މަނާކުރުމަށް ރައީސް ޑރ. މުއިއްޒު މިއަދު ނިންމެވި ނިންމެވުމަށް ތާއީދުކޮށް އެތައް ބަޔަކު އަންނަނީ ސޯޝަލް މީޑިއާގައި އެމަނިކުފާނަށް ތައުރީފު ކުރަމުންނެވެ.
ކަސްޓަމްސްގެ ތަފާސްހިސާބަށް ބަލާއިރު މި އަހަރުގެ ޖެނުއަރީން ފެށިގެން މިދިޔަ ޖުލައި މަހާ ހަމައަށް އެކަނިވެސް 19.7 މިލިއަން ރުފިޔާގެ ވޭޕް ރާއްޖެ އެތެރެކޮށްފައިވެ އެވެ. ވޭޕް އަކީ ސިއްހަތަށް ގެއްލުން ހުރި އެއްޗަކަށްވާތީ 50 ގައުމަކަށް ވޭޕް އެތެރެކުރުން މިހާރުވެސް މަނާކޮށްފައިވެ އެވެ.
