މިހާރު ރަހުނަކާ ނުލައި ނެގޭ 100،000 ރުފިޔާގެ ލޯނު 500،000 ރުފިޔާއަށް ބޮޑުކުރުމަށް އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އާ އެކު މަސައްކަތް ކުރަމުންދާ ކަމަށް މިނިސްޓަރު ވިދާޅުވި އެވެ.
ދަނޑުވެރިކަމުގެ ސިނާއަތު އިތުރަށް ކުރިއެރުވުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށް މިނިސްޓަރު ފާހަގަކުރެއްވި އެވެ. މިގޮތުން ދަނޑުވެރި ނަފާ ލޯނު ޕްރޮގްރާމުގެ ދަށުން މިހާތަނަށް 16 މިލިއަން ރުފިޔާގެ ލޯނު ދޫކޮށްފައިވާ ކަމަށާއި މި ޕްރޮގްރާމް އިތުރަށް ހަރުދަނާކުރުމުގެ މަސައްކަތް ކުރިއަށްދާ ކަމަށް މިނިސްޓަރު ވިދާޅުވި އެވެ.
މީގެ އިތުރުން، ދަނޑުވެރިކަމަށް ދޫކުރާ ލޯނުތަކަކީ އިސްލާމިކް ފައިނޭންސިން އުސޫލުގެ ދަށުން ދޫކުރާ ލޯނުތަކަކަށް ހެދުމުގެ މަސައްކަތްވެސް ކުރިއަށްދާ ކަމަށް މިނިސްޓަރު ވިދާޅުވި އެވެ. އަދި ސަރުކާރާއި އިންޓަނޭޝަނަލް ފަންޑް ފޯ އެގްރިކަލްޗަރަލް ޑިވެލޮޕްމަންޓް (އިފާޑް) ގުޅިގެން ހިންގާ ބިޒްނަސް ޕްރޮގްރާމުގެ ދަށުން 12 ރަށެއްގައި ނަމޫނާ ގްރީން ހައުސް ތައްޔާރުކޮށްފައިވާ ކަމަށާއި އިތުރު 5 ރަށެއްގައި ނަމޫނާ ގްރީން ހައުސް ތައްޔާރުކުރުމުގެ މަސައްކަތް ކުރުމަށް ހަމަޖެހިފައިވާ ކަމަށްވެސް މިނިސްޓަރު ވިދާޅުވި އެވެ.
