މި ދިރާސާއަކީ ވޯލްޑް ބޭންކުގެ އެހީގައި ކުރިއަށްގެންދާ ސަސްޓެއިނަބަލް އެންޑް އިންޓެގްރޭޓެޑް ލޭބަރ ސަރވިސަސް (ސެއިލްސް) ޕްރޮޖެކްޓުގެ ދަށުން ކުރަމުންދާ މަސައްކަތެކެވެ.
"ނެޝަނަލް ހިއުމަން ކެޕިޓަލް ނީޑް އެނާލިސިސް" ގެ ނަމުގައި ކުރިއަށްގެންދާ މި ދިރާސާގެ މައިގަނޑު މަގުސަދަކީ ދިވެހިރާއްޖޭގެ ތަރައްގީއާއި ކުރިއެރުމަށް އެންމެ ބޭނުންވާ ދާއިރާތަކުން މަތީ ތައުލީމާއި ތަމްރީނުގެ ފުރުސަތުތައް ފަހިކޮށްދިނުމެވެ. މި ދިރާސާއަށް ސަރުކާރުގެ އެންމެހާ އިދާރާތަކާއި، ސަރުކާރުގެ ކުންފުނިތަކުގެ އިތުރުން ކައުންސިލްތަކުން މައުލޫމާތު އެއްކޮށްފައިވާ ކަމަށް މިނިސްޓްރީން ހާމަކުރިއެވެ.
މިނިސްޓްރީން އިތުރަށް ބުނީ މިހާރު ކުރިއަށްދަނީ މައުލޫމާތު ނުލިބޭ ބައެއް ތަންތަނުން އިތުރު މައުލޫމާތު ހޯދުމުގެ މަސައްކަތާއި، މިހާތަނަށް ލިބިފައިވާ މައުލޫމާތު ތަރުތީބުކުރުމުގެ މަސައްކަތްތައް ކަމަށެވެ. އަދި މި ދިރާސާ ރިޕޯޓުގެ ފުރަތަމަ ޑްރާފްޓް ނިންމައި، އެ ރިޕޯޓާ ގުޅޭ ވެލިޑޭޝަން ވޯކްޝޮޕެއް ބާއްވާފައިވާ ކަމަށްވެސް މިނިސްޓްރީން ފާހަގަކުރިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅުތަކުގެ ތެރޭގައި ހިމެނޭ، ހާއްސަ ފަންނުތަކުން ދިވެހިންނަށް ކުރިއަށް ދެވޭނެ އިންތިޒާމު ހަމަޖެއްސުމާއި، ގައުމީ ތަރައްގީގައި ދިވެހިން ޝާމިލުވުމުގެ ފުރުސަތު ފަހިކޮށްދިނުމަށް މި ދިރާސާއިން މަގުފަހިވާނެ ކަމަށް އުންމީދުކުރެވެއެވެ. މި ދިރާސާގެ ނަތީޖާތަކަށް ބިނާކޮށް، ކުރިއަށް އޮތް ތަނުގައި ދިވެހިންނަށް ބޭނުންވާ މަތީ ތައުލީމާއި ތަމްރީނުގެ ފުރުސަތުތައް އިތުރުކުރެވޭނެ ކަމަށް މިނިސްޓްރީން ބުނެއެވެ.
