ފައްޔާޒް ވިދާޅުވީ، އެންމެ ކުޑަމިނުން ސިޔާސީ މުވައްޒަފުންގެ އަދަދުވެސް މި ސަރުކާރަށް ހާމަނުކުރެވުނު ކަމަށެވެ. އޭނާ ވިދާޅުވިގޮތުގައި މި ސަރުކާރުގެ ސިޔާސީ މުވައްޒަފުންގެ އަދަދަކީ 2300 އަރާކަަމެވެ. ނަމަވެސް ސަރުކާރުން ބުނެފައިވަނީ ސިޔާސީ މަގާމުތަކުގެ އަދަދު 700 އަށް ވުރެ މައްޗަށް ނުދާނެ ކަމަށެވެ.
މިގޮތުން އޭނާ ފާހަގަކުރެއްވީ އައްޑޫގައި 2000 އިންޑިއާ ސިފައިން ތިބިކަމަށް ސަރުކާރުން ބުނި ނަމަވެސް، މިހާތަނަށް އެ ސިފައިން ނުފެނުނު ކަމަށެވެ. އަދި ޔޫޓީއެފްގައާއި ހަނިމާދޫގައި ސިފައިން ތިބިކަމަށް ބުނެ ބޮޑު ޑުރާމާއެއް ކުޅުނު ކަމަށްވެސް އޭނާ ވިދާޅުވިއެވެ.
ފައްޔާޒް އިތުރަށް ވިދާޅުވީ، ހައިޑްރޯގްރަފީގެ ކަންކަމުގައި އިންޑިއާއަށް ދޫކޮށްލައިގެން އުޅުނުކަމަށް ސަރުކާރުން ބުނި ކަމަށާއި، މި ކަންކަން ހާމަކުރައްވާނެކަމަށް ރައީސް މުހައްމަދު މުއިއްޒު ވިދާޅުވި ނަމަވެސް، މިހާތަނަށް އެއިން އެއްވެސް އެއްޗެއް ހާމައެއް ނުކުރެއްވޭ ކަމަށެވެ. މިކަންކަމުން ދައްކުވައިދެނީ މިހާރުގެ ސަރުކާރުން ހާމަކަން ގެއްލުވާލާފައިވާކަން ކަމަށް ފައްޔާޒް ވިދާޅުވިއެވެ.
