މި މަޝްރޫއަކީ ރަށުގެ އިރުމަތީ ފަރާތުން 25 ހެކްޓަރުގެ ބިން ހިއްކުމަށް ކުރިއަށްގެންދާ މަސައްކަތެކެވެ.
އެމްޓީސީސީން ބުނީ މި މަޝްރޫއުގެ އަމަލީ މަސައްކަތް ފެށިފައިވަނީ މިއަހަރުގެ އެޕްރީލް 18 ގައެވެ. މި މަޝްރޫއަކީ 148.2 މިލިއަން ރުފިޔާގެ މަޝްރޫއެއް ކަމަށާއި، އަށް މަސްދުވަހުގެ ތެރޭގައި ނިންމުމަށް ރޭވިފައިވާ މަސައްކަތެއް ކަމަށް އެމްޓީސީސީން ބުންޏެވެ.
މި މަޝްރޫއު އެމްޓީސީސީއާ ހަވާލުކުރެވުނީ މިދިޔަ އަހަރުގެ އޮގަސްޓު މަހުގެ 21 ވަނަ ދުވަހުއެވެ. މަސައްކަތް ކުރިއަށްދާ ބާރުމިނަށް ބަލާއިރު، ކަނޑައެޅިފައިވާ މުއްދަތުގައި މަސައްކަތް ނިންމޭނެ ކަމަށް އެމްޓީސީސީން އުންމީދުކުރާ ކަމަށް ވެސް ބުންޏެވެ.
ކިނބިދޫގައި މި ބިން ހިއްކުމުގެ މަޝްރޫއު ނިމުމުން، ރަށުގެ ބިމުގެ ބޮޑުމިން އިތުރުވެ، ރަށުގެ ތަރައްގީއަށް އިތުރު ފުރުސަތުތަކެއް ހުޅުވިގެންދާނެ ކަމަށް ބެލެވެއެވެ. މީގެ އިތުރުން، ރަށުގެ އާބާދީ އިތުރުވަމުންދާ މިންވަރަށް ބަލާއިރު، މި އިތުރުވާ ބިމަކީ ރަށުގެ ދިރިއުޅުމުގެ ހާލަތު ރަނގަޅުކުރުމަށް ލިބޭނެ ބޮޑު ކުރިއެރުމެއް ކަމަށް ސަރުކާރުން ވަނީ މިމަޝްރޫއު ފެށުމުގެ ގޮތުން ބުނެފައެވެ.
