އުރަމަތީގެ ކެންސަރާ ބެހޭ ހޭލުންތެރިކުރުމުގެ ގައުމީ ސިމްޕޯޒިއަމްގެ އިފްތިތާހީ ރަސްމިއްޔާތުގައި ސާޖިދާ މުހައްމަދު ވިދާޅުވި ގޮތުގައި އުރަމަތީގެ ކެންސަރަށް ޓެސްޓްކުރެވެނީ 40 އަހަރުން މަތީގެ އަންހެނުންނަށެވެ. އެހެންކަމުން، އެ އުމުރުފުރައިގެ ހުރިހާ އަންހެނުންވެސް މެމޮގްރާމެއް ހެއްދެވުމަށް އެކަމަނާ ވަނީ އިލްތިމާސް ކުރައްވާފައެވެ. އަވަހަށް އުރަމަތީގެ ކެންސަރު ހުރިކަން ދެނެގަނެވިއްޖެނަމަ، އަވަސް ފަރުވާއިން ބަލިން ފަސޭހަވާ މިންވަރު ބޮޑުވާނެކަމަށް ސާޖިދާ ވިދާޅުވިއެވެ.
ރާއްޖޭގައި އުރަމަތީގެ ކެންސަރު ޖެހޭ މިންވަރު އިތުރުވަމުންދާކަން ފާހަގަކުރެވޭ ކަމަށް ސާޖިދާ ވިދާޅުވިއެވެ. އަދި މި ބާވަތުގެ ކެންސަރަކީ ބަލިން ފަސޭހަވުމަށްފަހު ވެސް އޭގެ އަސަރުތައް އަންހެނުން ތަހައްމަލްކުރަންޖެހޭ ނުރައްކާތެރި ކެންސަރެއްކަމަށް އެކަމަނާ ވިދާޅުވިއެވެ. އެހެންކަމުން، އުރަމަތީގެ ކެންސަރަށް ދިވެހި މުޖުތަމައު ހޭލުންތެރިކުރުވައި، އެ ބާވަތުގެ ކެންސަރު ޖެހޭ މިންވަރު މަދު ކުރަން މަސައްކަތްކުރަންޖެހޭ ކަމަށް ސާޖިދާ ވިދާޅުވިއެވެ.
މިހާރު ރާއްޖޭގައި ވެސް ކެންސަރަށް ދެވޭ އެކި ފަރުވާތައް ހުރިކަމަށް ސާޖިދާ ފާހަގަކުރެއްވިއެވެ. އޭގެ ތެރޭގައި ކީމޯތެރަޕީގެ ހިދުމަތް ހިމެނެއެވެ. އަދި އައިޖީއެމްއެޗްގައި މިހާރު ތްރީޑީ މެމޮގްރާމެއް ހެދޭތީ، މެމޮގްރާމެއް ހެއްދުމަށް ކޮންމެހެން ރާއްޖެއިން ބޭރަށް ދާން ނުޖެހޭނެކަމަށްވެސް އެކަމަނާ ވިދާޅުވިއެވެ. މި ސިމްޕޯޒިއަމްގެ ބޭނުމަކީ އަންހެނުންނަށް ޖެހޭ އުރަމަތީގެ ކެންސަރާ މެދު ހޭލުންތެރިކަން އުފައްދާ، ބަލިން ރައްކާތެރިވުމަށް އެޅިދާނެ ފިޔަވަޅުތަކާ ބެހޭގޮތުން މަޝްވަރާކުރުމެވެ.
