ޓީވީޗެނަލެއްގައި ވާހަކަ ދައްކަވަމުން މަމްދޫހު ވިދާޅުވީ، އެމްޑީޕީން މިހާރު އިދިކޮޅު ޕާޓީގެ ދައުރު އަދާކުރަމުންދާއިރު، އެ ޕާޓީން ފާޑު ނުކިޔާނެ ގޮތަކަށް ސަރުކާރަށް އެއްވެސް ކަމެއް ނުކުރެވޭނެ ކަމަށެވެ.
މަޖިލީހުގެ ތެރެއިންނާއި އެހެން ގޮތްގޮތުން ވަކިން ބައްދަލުވާއިރު، އެމްޑީޕީއަށް ނިސްބަތްވާ ފަރާތްތަކުން ރައީސް ޑރ. މުހައްމަދު މުއިއްޒުގެ ނިންމެވުންތަކަށް ތާއީދުކޮށް މަރުހަބާ ކިޔާ ކަމަށެވެ.
މަމްދޫހު ވިދާޅުވީ އެމްޑީޕީން މިހާރު އެންމެ ބޮޑަށް އަމާޒު ހިފާފައިވަނީ އެކި ކަހަލަ ވާހަކަތައް ފަތުރައިގެން ސަރުކާރު ތެރެ ގުޑުވާލުމަށް ކަމަށެވެ. ނަމަވެސް، ސަރުކާރު ހިންގާ ޕީއެންސީ އޮތީ ވަރަށް ގަދަކޮށް ކަމަށާއި، އެއްވެސް ފަރާތަކަށް ޕީއެންސީގެ ލަޝްކަރު ގުޑުވައެއް ނުލެވޭނެ ކަމަށް އޭނާ ވިދާޅުވިއެވެ.
މަމްދޫހު ވިދާޅުވީ، ޕާޓީއާއި ސަރުކާރު އަދި މަޖިލިސް ތެރެވެސް އޮތީ ވަރަށް އެކުވެރިކޮށް ކަމަށާއި، އެމްޑީޕީން ތުހުމަތުކުރާ ފަދަ އެއްވެސް ނުތަނަވަސްކަމެއް ނެތް ކަމަށެވެ. އެހެންކަމުން، އެމްޑީޕީން ކުރާ ފާޑުކިޔުންތަކަކީ ހަމައެކަނި ސިޔާސީ ބޭނުމަށް ކުރާ ކަމެއް ކަމަށް އޭނާ ވިދާޅުވިއެވެ.
