މި ބަދަލު ގެނެސްފައިވަނީ އެފަދަ ދިރޭ ތަކެތީގެ ބައިނަލްއަގުވާމީ ވިޔަފާރި ކޮންޓްރޯލްކުރުމަށް ހެދިފައިވާ ގަވާއިދަށް އިސްލާހު ގެނައުމަށްފަހުއެވެ.
އެންވަޔަރަންމަންޓް މިނިސްޓްރީން ބުނީ މި ގަވާއިދުގެ ދަށުން ނެތިދިއުމުގެ ބިރު ހީވެފައިވާ ދިރޭ އެއްޗެއް ހުއްދަނެތި އިމްޕޯޓްކުރުމާއި، އެކްސްޕޯޓްކުރުމާއި، ރީއެކްސްޕޯޓްކުރުމާއި، ކަނޑުން އެތެރެކުރުމަކީ މަނާކަމެއް ކަމަށެވެ. އަދި މިފަދަ އެއްޗެއް އެތެރެކޮށްފިނަމަ، އެތެރެކުރި ކޮންމެ އެއްޗަކަށް 30،000 ރުފިޔާގެ މަގުން ޖޫރިމަނާ ކުރެވޭނެ ކަމަށް އެ މިނިސްޓްރީން ބުންޏެވެ.
މީގެ އިތުރުން، ނެތިދިއުމުގެ ބިރު ހީވެފައިވާ ދިރޭ އެއްޗެއްގެ ބައެއް ނުވަތަ އެއިން އެއްޗެއްގެ އުފެއްދުމެއް ހުއްދަނެތި އެތެރެކޮށްފިނަމަ، އެތެރެކުރި ކޮންމެ އެއްޗަކަށް 10،000 ރުފިޔާގެ މަގުން ޖޫރިމަނާކުރެވޭނެ ކަމަށްވެސް އެ މިނިސްޓްރީން މައުލޫމާތުދިނެވެ.
އެންވަޔަރަންމަންޓް މިނިސްޓްރީން އިތުރަށް ބުނީ މިފަދަ ދިރޭ އެއްޗެއް ނުވަތަ އޭގެ ބައެއް އަމިއްލަ ބޭނުމަށް ގެންގުޅުމާއި، ވިއްކުމާއި، އާންމުންނަށް ފެންނަ ތަންތަނުގައި ބެހެއްޓުމަކީވެސް މަނާކަމެއް ކަމަށެވެ. މިފަދަ އަމަލެއް ކޮށްފިނަމަ އެ މައްސަލައިގައި ހިމެނޭ ކޮންމެ އެއްޗަކަށް 10،000 ރުފިޔާގެ މަގުން ޖޫރިމަނާކުރެވޭނެ ކަމަށްވެސް އެ މިނިސްޓްރީން ބުންޏެވެ.
