މި މައްސަލައިގައި ހައްޔަރުކޮށްފައިވަނީ 27 އަހަރުގެ ދިވެހި ފިރިހެނެކެވެ.
ކްރިމިނަލް ކޯޓަށް ހާޒިރުކުރުމުން، އެ ކޯޓުން ވަނީ އޭނާ 15 ދުވަހަށް ބަންދުކުރުމަށް އަމުރުކޮށްފައެވެ. ކޯޓު އަމުރުގައިވާ ގޮތުން، އޭނާ ވަނީ ސައްހަ ނޫން ސްލިޕެއް ފޮނުވައިގެން ބިދޭސީއެއްގެ އަތުން މި ފައިސާ ހޯދާފަ އެވެ. އަދި މީގެ ތެރެއިން ބައެއް ފައިސާ އަނބުރާ ދީފައިވާ ކަމަށާއި، ގެއްލުން ލިބުނު މީހާއަށް ފައިސާ ދޭނެ ކަމަށް އޭނާގެ އަނބިމީހާއާއި އާއިލާއިން އެއްބަސްވެފައިވާ ކަމަށްވެސް އަމުރުގައި ބަޔާންކޮށްފައިވެއެވެ.
ހައްޔަރުކުރެވުނު މީހާ މި ފައިސާ ދޭން އެއްބަސްވެފައިވީ ނަމަވެސް، އެއީ އޭނާ ކުރި ކަމެއް ނޫން ކަމަށް ބުނެފައިވެ އެވެ. ނަމަވެސް، އޭނާ ފައިސާ ހޯދާފައިވާ މީހާއަކީ ބިދޭސީއަކަށްވުމާއި، އެ މީހާގެ މައުލޫމާތު އޭނާއަށް އެނގޭތީ، ބާރު ފޯރުވިދާނެ ކަމަށް ބެލެވޭތީ އޭނާ ބަންދުން ދޫކޮށްނުލުމަށް ކްރިމިނަލް ކޯޓުން ވަނީ އަމުރުކޮށްފައެވެ.
ސޯޝަލް މީޑިއާގައި ގިނަ ބަޔަކު ވަނީ މި މީހާއަކީ މީގެ ކުރިންވެސް މިފަދަ އެތައް ކުށެއް ކޮށްފައިވާ ފަރާތެއްކަމަށް ތުހުމަތުކޮށްފަ އެވެ. އޭގެ ތެރޭގައި ފަރުނީޗަރު ވިއްކާ ކަމަށް ބުނެ ފައިސާ ނެގުމާއި، ފްލެޓްތަކުގެ ފިނިޝިން މަސައްކަތް ކޮށްދޭ ކަމަށް ބުނެ ފައިސާ ހޯދުން ހިމެނެއެވެ. މި މައްސަލަ ފުލުހުން ދަނީ ތަހުގީގުކުރަމުންނެވެ.
