މިނިސްޓަރު ތާރިގު ވިދާޅުވި ގޮތުގައި ރާއްޖެއަށް ނުރައްކާތެރި ކެމިކަލް އެތެރެކުރާ މިންވަރު އިތުރުވެފައިވާތީ، މިފަދަ ކެމިކަލްތައް މެނޭޖްކުރެވޭނެ ރަނގަޅު އިންތިޒާމުތަކެއް ހަމަޖެއްސުމަކީ މުހިންމު ކަމެއް ކަމުގައި ސަރުކާރުން ދެކޭ ކަމަށެވެ. އެހެންކަމުން، ރާއްޖޭގެ އެކި ސަރަހައްދުތަކުގައި މިފަދަ ފެސިލިޓީތައް ތަރައްގީކުރުމުގެ މަސައްކަތް ސަރުކާރުން ކުރިއަށް ގެންދާ ކަމަށް އޭނާ ވިދާޅުވި އެވެ.
އައްޑޫ ސިޓީގައި ހުޅުވުނު މަރުކަޒުގެ އިތުރުން، ރ. ވަންދޫގައިވެސް ނުރައްކާތެރި ކެމިކަލް މެނޭޖްކުރާނެ ފެސިލިޓީއެއް ތަރައްގީކުރުމުގެ މަސައްކަތް ކުރިއަށްދާ ކަމަށް މިނިސްޓަރު ތާރިގު ވިދާޅުވި އެވެ. މި މަސައްކަތްތައް ކުރިއަށް ގެންދަނީ ރާއްޖެއަށް އެތެރެކުރާ ނުރައްކާތެރި ކެމިކަލްތައް ރައްކާތެރިކަމާއެކު ބެލެހެއްޓުމަށް ކަމަށް އޭނާ ވިދާޅުވިއެވެ.
މި މައުލޫމާތު ހާމަކުރެއްވި އިރު، މާލެ ސަރަހައްދުގައި ނުރައްކާތެރި ކެމިކަލް ގެންގުޅޭ 206 ތަނެއް ހުރި ކަމަށް ޑިފެންސް މިނިސްޓްރީން ބުނެފައިވެއެވެ. މީގެ ތެރޭގައި ހިމެނެނީ ނުރައްކާތެރި ކެމިކަލް ގުދަންކުރާ 144 ތަނާއި ކެމިކަލް ވިއްކާ 62 ފިހާރަ ކަމަށް އެ މިނިސްޓްރީން މައުލޫމާތު ދީފައިވެ އެވެ.
