މިނިސްޓަރު މިހެން ވިދާޅުވެފައިވާނީ ފްރާންސްގެ ޕެރިސްގައި ބޭއްވި 6 ވަނަ "ކްރިއޭޓިވިޓީ އިން އެޑިޔުކޭޝަން" ސަމިޓްގައި ދެއްކެވި ވާހަކަފުޅުގަ އެވެ.
މިނިސްޓަރު ވިދާޅުވީ އެކި ދާއިރާތަކުގެ މައްސަލަތަށް ހައްލުކުރުމަށް އަމަލީ މަސައްކަތްކުރުމަކީ ދަރިވަރުންނަށް އުފެއްދުންތެރިކަން އިތުރުވެގެންދާނެ ކަމެއްކަމަށެވެ. އަދި މަތީ ތައުލީމުގައި އުފެއްދުންތެރިކަން އިތުރުކުރުމަށް ސައިންސް އަދި ސޯޝަލް ސައިންސް ފަދަ އެކި މާއްދާތަކުގައި، އަސްލު ދިރިއުޅުމުގައި ދިމާވާއެކި ކަންކަމަށް ހައްލު ހޯދުމަށް ދަރިވަރުންނަށް ޕްރޮޖެކްޓްތަށް ހަވާލުކުރެވިދާނެކަމަށެވެ.
އެގޮތުން ދެމެހެއްޓެނެވި ތަރައްގީ ހޯދުމަށް ކުރެވިދާނެ މަސައްކަތްތަކާއި ގުޅޭގޮތުން ދިރާސާކުރުމާއި ތާރިހުގައި ހިނގައި ދިޔަ ކަންކަމާއި ގުޅޭގޮތުން ދަރިވަރުންގެ މެދުގައި ބަހުސްކުރުން ފަދަ ކަންކަން ތައުލީމީ ނިޒާމުގައި ހިމެނުމަކީ އުފެއްދުންތެރި ހައްލުތައް ހޯދުމަށް މަގުފަހިވެގެންދާނެކަމެއްކަން ވެސް އެކަމަނާ ފާހަގަކުރެއްވިއެވެ.
އެފަދަ ކަންކަން ތައުލީމީ ނިޒާމުގައި ހިމެނުމަށް ލެކްޗަރާއިންނަށް އެކަށިގެންވާ ތަމްރީނާއި ބޭނުންވާ ވަސީލަތްތަށް ފޯރުކޮއްދޭން ޖެހޭކަމަށް ވެސް އެކަމަނާ ވަނީ ފާހަގަކުރައްވާފަ އެވެ.
ޔުނެސްކޯ އަދި ގްލޯބަލް ކްރިއޭޓިވް ތިންކިން އިންސްޓިޓިއުޓްގެ ފަރާތުން އިންތިޒާމްކުރައްވައި މި އޮކްޓޯބަރ މަހުގެ 17 އަދި 18 ވަނަ ދުވަހު ޕެރިސްގައި ކުރިއަށް ދިޔަ މި ސަމިޓްއަކީ ދުނިޔޭގެ އެކި ކަންކޮޅުތަކުގެ ތަޖުރިބާކާރު އިލްމީ ބޭފުޅުންނާއި ތައުލީމީ ދާއިރާގައި މަސައްކަތްކުރައްވާ އިސްބޭފުޅުންގެ މެދުގައި، ތައުލީމީ ދާއިރާގައި އުފެއްދުންތެރިކަން އިތުރުކުރުމާއި ގުޅިގެން މަޝްވަރާކޮށް، މައުލުމާތު ހިއްސާކުރުމަށް ބޭއްވުނު ސަމިޓެކެވެ.
