1995 އިން ފެށިގެން ހިމާޔަތްކޮށްފައިވާ ރަސްފަރި ފަރަށް ގެއްލުންވީ 2021 ވަނަ އަހަރުގެ އޮގަސްޓު މަހު އެފަރަށް ފަރަށް ބާޖެއް އަރުމުންނެވެ. މާލެ އަތޮޅުގައި އޮންނަ މި ފަރަށް ބާޖެއް އެރުމުން ފަރުގެ 2800 އަކަމީޓަރަށް ވުރެ ބޮޑު ސަރަހައްދެއް ވަނީ ހަލާކުވެފައެވެ.
ރަސްފަރި ފަރު އާރާސްތުކޮށް އަލުން އިޔާދަކުރުމުގައި އެހީތެރިކަން ފޯރުކޮށްދިނުމަށް އެމްޑަބްލިޔުއެސްސީން ނިންމާ އެކަމުގެ އެއްބަސްވުމުގައި އެންވަޔަރަންމަންޓަލް ޕްރޮޓެކްޝަން އޭޖެންސީ، (އީޕީއޭ) އާއެކު ވަނީ ސޮއިކޮށްފައެވެ.
މި އެއްބަސްވުމުގައި ސޮއިކުރުން އޮތީ ތިމާވެށިގެ ކަންކަމުގައި ބޭނުންކުރުމަށް ބަނދެފައިވާ ރިސާޗް އުޅަނދު އާރްވީ ތިމަވެށީގައެވެ.
އެމްޑަބްލިޔުއެސްސީގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު، އަބްދުލް މަތީން މުހައްމަދެވެ. އީޕީއޭގެ ފަރާތުން ސޮއިކުރެއްވީ ޑިރެކްޓަރ ޖެނެރަލް އިބްރާހިމް ނައީމެވެ.
ރަސްފަރީ މުރަކަ ފަރު އިޔާދަކުރުމުގެ މަސައްކަތުގައި ބޭނުންކުރާ ރިސާޗް އުޅަނދު އާރު.ވީ ތިމާވެށީގައި މަސައްކަތްކުރާ ޓީމް. ފޮޓޯ: އެމްޑަބްލިޔުއެސްސީ
މި އެއްބަސްވުމުގެ ދަށުން ރަސްފަރީ މުރަކަ ފަރު އިޔާދަކުރުމުގެ މަސައްކަތުގައި ބޭނުންކުރާ ރިސާޗް އުޅަނދު އާރު.ވީ ތިމާވެށީގައި ފެން ޕްލާންޓެއް ބެހެއްޓުމާއި ސާވޭ ކުރުމަށް ބޭނުންވާ ސާމާނު ހޯދައިދޭނީ އެމްޑަބްލިއުއެސްސީންނެވެ. އަދި މި މަސައްކަތުގައި އުޅޭ މީހުންނަށް ފެން ފޯރުކޮށްދިނުމައި ދަތުރު ފަތުރުގެ އިންތިޒާމުތައްވެސް ހަމަޖައްސާނީ އެމްޑަބްލިޔުއެސްސީންނެވެ. މި ކަންކަން އެމްޑަބްލިއުއެސްސީން ކުރަނީ އެ ކުންފުނީގެ ސީއެސްއާރުގެ ދަށުންނެވެ.
