މޯލްޑިވްސް މީޑިއާ ކައުންސިލް (އެމްއެމްސީ) މިދައުރު މެމްބަރުންގެ ދައުރު ހަމަވާތީ އާ ކައުންސިލުގެ މެމްބަރުކަމަށް ކުރިމަތިލާން ހުޅުވާލީ މިދިޔަ މަހުގެ 16 ވަނަ ދުވަހުއެވެ. އެ މުއްދަތު ހަމަވީ މިދިޔަ މަހުގެ 25 ވަނަ ދުވަހަށެވެ.
ޔޫތު މިނިސްޓްރީން މިއަދު ކުރި އިއުލާނެއްގައި ބުނީ މީީޑިއާ ކައުންސިލުގެ މެމްބަރުކަމަށް ކުރިމަތިލުމަށް ހުޅުވާލި މުއްދަތު މިމަހުގެ 29 ގެ ނިޔަލަށް އިތުރުކޮށްފައިވާކަމަށެވެ. މެމްބަރު ކަމަށް ކުރިމަތިލާ ފޯމާއި ލިޔުންތައް މިހާތަނަށް ހުށަހަޅާފައިވާ ފަރާތްތަކުން އަލުން މެމްބަރުކަމަށް އެދި ހުށަހަޅަން ނުޖެހޭނެ ކަމަށް މިނިސްޓްރީން ބުނެއެވެ.
މީޑިއާ ކައުންސިލްގެ މި ދައުރުގެ 10 މެމްބަރެއްގެ ދައުރު އަންނަ ޑިސެމްބަރު މަހުގެ 14 ވަނަ ދުވަހަށް ހަމަވާނެއެވެ. އެއީ މީޑިއާ ތަކުން ތަމްސީލުކުރާ ހަތް މެމްބަރުންނާއިި އާންމުންގެ ފަރާތުން ކައުންސިލްގައި ތިބި ތިން މެންބަރުންނެވެ.
މޯލްޑިވްސް މީޑިއާ ކައުންސިލްގެ މެމްބަރުންގެ މުއްދަތަކީ މީލާދީ ގޮތުން ދެ އަހަރުއެވެ. ކައުންސިލްގެ އެއްވެސް މެމްބަރަކަށް ޖެހިޖެހިގެން ދެ ދައުރު އަދާ ނުކުރެވޭނެއެވެ.
މީޑިއާ ތަމްސީލުކުރާ ހަތް ގޮނޑިއަށް ކެންޑިޑޭޓުން ހުށައެޅޭނީ ރަޖިސްޓްރީ ކޮށްފައިވާ މީޑިއާތަކަށެވެ. އާންމު މެންބަރުންގެ ގޮތުގައި ބަލާނީ މީޑިއާ އާ ގުޅުންހުރި އެއްވެސް ދާއިރާއެއްގައި މަސައްކަތް ނުކުރާ ފަރާތްތަކެވެ.
