ގަލޮޅު ދެކުނު ދާއިރާގެ މެންބަރު މީކާއިލް ނަސީމް ހުށަހެޅުއްވި މި މައްސަލައަކީ، ސަރުކާރުގެ ސިޔާސީ މަގާމުތަކުގައި ތިބި މުވައްޒަފުންނާއި ރައީސް މުހައްމަދު މުއިއްޒުގެ އިތުރުން ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން ބައެއް އުނިކުރަން ރައީސް ނިންމެވި ނިންމުމާ ގުޅިގެން ހުށަހެޅުނު މައްސަލައެކެވެ.
މީކާއިލް ވިދާޅުވި ގޮތުގައި، މުސާރަ ކުޑަކުރަން ހުށަހަޅާފައިވާ މި ދަނޑިވަޅުގައި ސިޔާސީ މަގާމުތަކަށް ރައީސުލްޖުމްހޫރިއްޔާ އައްޔަނު ކުރައްވާފައިވާ ފަރާތްތަކުގެ އަދަދާއި އެ ފަރާތްތަކުގެ މަގާމުގެ މަސްއޫލިއްޔަތު ހާމަ ކޮށްދިނުމަށް ރައީސުލްޖުމްހޫރިއްޔާ އާއި ސަރުކާރަށް ގޮވާލުމަށްޓަކައި މި މައްސަލަ ހުށަހެޅުއްވީއެވެ.
މި މައްސަލަ ބަލައިނުގަތުމަށް ފާސްވީ މަޖިލީހަށް ހާޒިރުވެ ތިއްބެވި 59 މެންބަރުންގެ ވޯޓާ އެކުގަ އެވެ. އެ މައްސަލަ ބަލައިގަންނަން ފެންނަ ކަމަށް ވޯޓު ދެއްވީ އަށް މެންބަރުންނެވެ. މި މައްސަލަ ބޭރުކޮށްލާފައިވާއިރު، ނޮވެމްބަރު 17، 2023 ގައި ރައީސް ވެރިކަމާ ހަވާލުވެވަޑައިގަތުމަށް ފަހު މިނިސްޓްރީތަކަށް ގިނަ އަދަދެއްގެ މުވައްޒަފުން ވަނީ އައްޔަނުކޮށްފައިވާކަމަށާއި، ނަމަވެސް މިއަދާ ހަމައަށް އައިއިރު ވެސް މި ސަރުކާރުގައި ތިބި ޖުމުލަ ސިޔާސީ މުވައްޒަފުންގެ އަދަދެއް ނޭނގޭ ކަމަށް ވެސް މީކާއިލް ވަނީ ފާހަގަކުރައްވާފަ އެވެ.
