ތިން އަހަރު ދުވަހުގެ މި އެއްބަސްވުމަކީ ރެފްރިޖިރޭޝަން އެންޑް އެއާކޮންޑިޝަނިން (އާރްއޭސީ) ދާއިރާއިން ކުރިއެރުމަށް ޝައުގުވެރިވާ ޒުވާނުންނަށް، އެ ދާއިރާއިން ތަމްރީނުވެ، ރަސްމީ ސަނަދަކާއި ލައިސަންސެއް ހާސިލުކުރުމުގެ ފުރުސަތު ހުޅުވާލުމަށް ސޮއިކުރެވުނު އެއްބަސްވުމެއް ކަމަށް އެންވަޔަރަމަންޓް މިނިސްޓްރީން ބުނެއެވެ.
މި އެއްބަސްވުމުގައި، އެންވަޔަރަަމަންޓް މިނިސްޓްރީގެ ފަރާތުން މިނިސްޓަރު، ތޯރިގް އިބްރާހިމް ވަނީ ސޮއިކުރައްވާފައެވެ. އަދި ޕޮލިޓެކްނިކްގެ ފަރާތުން މި އެއްބަސްވުމުގައި ސޮއިކުރައްވާފައިވަނީ ޒޫޝާން ކަމާލުއްދީނެވެ.
މިޔަދު ވެވުނު މި އެއްބަސްވުމުގެ އަމާޒަކީ އޭސީ ފަދަ ތަކެތި މަރާމާތުކުރުމާއި މިދަފަ ތަކެތި ބޭނުންކުރުމުގައި ތިމާވެއްޓަށް ފައިދާ ހުރި އުފެއްދުންތެރި ގޮތްތަށް ހޯދައި، ރާއްޖޭގެ ގުދުރަތީ ވަސީލަތްތަށް ހިމާޔަތްކޮށް، ދަމަހައްޓާނެ ޒުވާނުން ބިނާކުރުން ކަމުގައި ކަން އެންވަޔަރަމަންޓް މިނިސްޓްރީން ބުނެއެވެ.
އޭގެ އިތުރުން މިފަދަ އެއްބަސްވުންތަކަކީ ގައުމުގެ ތަރައްގީއާއި ކުރިއެރުމަށް ބޭނުންވާ އެކި ދާއިރާތަކުން ޒުވާނުންނަށް ރަސްމީ ލައިސަންސް އަދި ރަސްމީ ސަނަދު ހާސިލުކުރުމުގެ ފުރުސަތު ހުޅުވާލައި، އެކި ދާއިރާތަކުން ހުނަރުވެރި ޒުވާނުން ބިނާކުރުން ކަމުގައި މިނިސްޓްރީން ފާހަގަކުރެއެވެ.
