މި މީހުން ހައްޔަރުކޮށްފައިވަނީ ލަންކާގެ ޓެރަރިޒަމް އިންވެސްޓިގޭޝަން ޑިވިޝަން (ޓީއައިޑީ) އިންނެވެ.
ރިޕޯޓުތައް ބުނާގޮތުން ހައްޔަރު ކުރި މީހާގެ ބައްޕައަކީ ދިވެއްސެކެވެ. އަދި މަންމައަކީ ލަންކާ މީހެކެވެ. ނަމަވެސް އޭނާއަކީ ދިވެހި އައިޑީ ކާޑެއް ނުވަތަ ޕާސްޕޯޓެއް ހަދާފައިވާ މީހެއް ނޫނެވެ. އަދި ރާއްޖެއަށް ވެސް އަންނަ މީހެއް ނޫން ކަމަށް ރިޕޯޓުތައް ބުނެ އެވެ.
މި ހަމަލާ ދޭން އުޅުނު ކަމުގެ މައުލޫމާތު އެންމެ ފުރަތަމަ ހާމަކުރީ އެމެރިކާގެ ސްޓޭޓް ޑިޕާޓްމަންޓުން ނެވެ. އެމެރިކާއިން ބުނެފައިވަނީ މިއީ އިޒްރޭލު މީހުންނަށް އަމާޒުކޮށް ދޭން އުޅުނު ހަމަލާއެއް ކަމަށެވެ. އެހެންކަމުން، ލަންކާއަށް ދާ އެމެރިކާ ރައްޔިތުން ސަމާލުވުމަށް އެގައުމުން ވަނީ އަންގާފަ އެވެ.
ލަންކާގެ ޓޫރިސްޓުންގެ މެދުގައި މަގުބޫލު އަރުގަމް ބޭ ސަރަހައްދަށް ނުދިއުމަށް އެމެރިކާއިން އިންޒާރު ދީފައިވެ އެވެ. މި އިންޒާރު ދީފައިވަނީ އެ ސަރަހައްދުގައި އިޒްރޭލުގެ އުފެއްދުންތައް ބޮއިކޮޓް ކުރުމަށް ގޮވާލައި ސޯޝަލް މީޑިއާގައި ކެމްޕޭނެއް ފެށުމާ ގުޅިގެންނެވެ.
