މިހާރު ކުރިއަށްދާ އދ.ގެ އާންމު މަޖިލީހުގެ ހަވާސާގައި، ގުދުސްއާ ގުޅޭގޮތުން ބޭއްވި އަރަބި އިސްލާމީ ގައުމުތަކުގެ ވަޒީރުންގެ ފެންވަރުގެ ބައްދަލުވުމުގައި، ފޮރިން މިނިސްޓަރު އިރުތިޝާމް އާދަމް ވިދާޅުވީ ފަލަސްތީނުގެ މައްސަލައިގައި ދިވެހިރާއްޖެއިން ގެންގުޅޭ ސިޔާސަތު ސާފުކަމަށެވެ.
އެގޮތުން މިހާރު އެބިމުގައި ހިންގަމުންދާ ޖަރީމާތައް ވަގުތުން ހުއްޓާލުމަށް ވަނީ ގޮވާލައްވާފަ އެވެ. އިރުތިޝާމް ވިދާޅުވީ ބައިނަލްއަގްވާމީ ގާނޫނުތަކާއި މުޢަހަދާތަކާއި ހިލާފަށް ގުދުސްގައި ޔަހޫދީން ވަޒަންވެރިކޮށް ހިންގަމުންދާ ޖަރީމާތަކާއެކުވެސް އެތަނުގެ މާތްކަމާއި އެތަނުގެ މުޤައްދަސްކަމަށް ބަދަލެއް ނާންނާނެކަމަށެވެ.
ފަލަސްތީނުގެ ހައްގުގައި ބައިނަލްއަގުވާމީ މުޖުތަމައުން އެއް އަޑަކުން ވާހަކަދައްކާތާ އެތައް އަހަރެއް ވެފައިވާކަން ފާހަގަކޮށް، އިރުތިޝާމް ގޮވާލެއްވީ، އެ އެއްބައިވަންތަކަން އަމަލީ ފިޔަވަޅުތަކަކަށް ބަދަލުކޮށް، ނަތީޖާ ނެރުމަށް މިހާރުން މިހާރަށް މަސައްކަތް ފެށުމަށެވެ.
ޖޮއިންޓް އަރަބް އިސްލާމިކް މިނިސްޓީރިއަލް މީޓިން އޮން ޖެރުސަލެމްއަކީ ގުދުސްގައި ހިންގަމުންދާ ހަމަނުޖެހުންތަކާއި ގުޅިގެން އުރުދުންގެ ފަރާތުން މިމައްސަލައިގައި ހައްލެއް ހޯދުމަށް ޢަރަބި އިސްލާމީ ޤައުމުތަކާއި ގުޅިގެން ބާއްވަމުންދާ ބައްދަލުވުންތަކެކެވެ.
