ނައިބު ރައީސްގެ މި ދަތުރުފުޅުގައި ފޮރިން މިނިސްޓަރު އަބްދުﷲ ހަލީލާއި، ސްޕޯޓްސް މިނިސްޓަރު އަބްދުﷲ ރާފިއު އަދި އިނގިރޭސިވިލާތުގައި ހުންނަ ދިވެހި ހައިކޮމިޝަނަރު އިރުތިޝާމް އާދަމް ބައިވެރިވެ ވަޑައިގެންނެވި އެވެ.
ސަމޯއާގެ ވެރިރަށް އަޕިއާގައި އޮކްޓޯބަރު 21 އިން 26 އަށް ކުރިއަށް ދިޔަ ބައްދަލުވުމުގައި ނައިބު ރައީސް ވަނީ ތަފާތު ގިނަ ބައްދަލުވުންތަކުގައި ބައިވެރިވެ ވަޑައިގެންފަ އެވެ. އޭގެ ތެރޭގައި މޫސުމަށް އަންނަ ބަދަލުތަކާ ގުޅޭ ބައްދަލުވުމާއި ވިޔަފާރީގެ ދާއިރާއާ ގުޅޭ ބައްދަލުވުންތައް ހިމެނެ އެވެ.
މިއީ ރައީސް މުހައްމަދު މުއިއްޒުގެ ސަރުކާރުން ބައިވެރިވި ފުރަތަމަ ކޮމަންވެލްތު އިސްވެރިންގެ ބައްދަލުވުމެވެ. ދަތުރުފުޅުގެ ތެރޭގައި ނައިބު ރައީސް ވަނީ ސަމޯއާގެ ބޮޑު ވަޒީރު ފިއާމޭ ނައޯމީ މަޓައާފާ އާވެސް ބައްދަލުކުރައްވައިފަ އެވެ.
ކޮންމެ ދެ އަހަރަކުން އެއްފަހަރު ބާއްވާ މި ބައްދަލުވުމަކީ ކޮމަންވެލްތު މެމްބަރު ގައުމުތަކުގެ އިސްވެރިން އެއްތަނަކަށް އެއްވެ، އިގްތިސާދީ އަދި ތިމާވެށީގެ މައްސަލަތަކާ މެދު މަޝްވަރާކުރާ މުހިންމު ބައްދަލުވުމެކެވެ.
