މި ފެސިލިޓީ ހެދީ ގްލޯބަލް އެންވަޔަރަމަންޓް ފެސިލިޓީ (ޖީއީއެފް)ގެ މާލީ އެހީގައި އެންވަޔަރަމަންޓް މިނިސްޓްރީން ހިންގާ ޕޮޕްސް މަޝްރޫއުގެ ދަށުންނެވެ.
އެންވަޔަރަމަންޓް މިނިސްޓްރީން ބުނީ މި ފެސިލިޓީގައި މެޑިކަލް ވޭސްޓް ނައްތާލާނީ ތިމާވެއްޓާ ރައްޓެހި ގޮތަކަށް ކަމަށާއި، ޖައްވަށް ބޭރުވާ ވިހަ މާއްދާތައް މަދުވާނެ ގޮތަށް ކަމަށެވެ. އަދި މިކަމުގެ ސަބަބުން ބާރަށުގެ ރައްޔިތުންގެ ސިއްހަތަށް ކުރިމަތިވެދާނެ ނޭދެވޭ އަސަރުތަކުން ރައްކާތެރިވެވޭނެ ކަމަށް އެ މިނިސްޓްރީން ބުންޏެވެ.
މި ފެސިލިޓީ ހެލްތު މިނިސްޓްރީއާ ހަވާލުކުރުމުގެ އެއްބަސްވުމުގައި ސޮއިކުރީ އެންވަޔަރަމަންޓް މިނިސްޓަރު ތޯރިގް އިބްރާހިމް އާއި ހެލްތު މިނިސްޓަރު އަބްދުﷲ ނާޒިމް އިބްރާހިމެވެ. މި ރަސްމިއްޔާތުގައި ބާރަށު ދާއިރާގެ މެންބަރު އިބްރާހިމް ޝުޖާއު ވެސް ބައިވެރިވި އެވެ.
އެންވަޔަރަމަންޓް މިނިސްޓްރީން އިތުރަށް ބުނީ މި މަޝްރޫއުގެ ދަށުން އައްޑޫގައި ނުރައްކާތެރި ކެމިކަލް ހިމެނޭ ކުނި ބެހެއްޓުމަށް އިންޓެރިމް ހެޒާޑަސް ކެމިކަލް ވޭސްޓް ސްޓޯރޭޖް ފެސިލިޓީއެއް ހަދަމުން ގެންދާ ކަމަށާއި، ރ. ވަންދޫގައި ހެޒާޑަސް ކެމިކަލް އެންޑް ވޭސްޓް މެނޭޖްމަންޓް ސިސްޓަމެއް ގާއިމްކުރުމުގެ މަސައްކަތް ވެސް ކުރިއަށްދާ ކަމަށެވެ.
