ރާއްޖޭގެ އެންމެ ބޮޑު ޕާޓީއަށް ޕީއެންސީ ހެދުމަށް ރައީސް މުހައްމަދު މުއިއްޒު ވަނީ އަމާޒު ހިތްޕަވައި އެ ޕާޓީއަށް މެންބަރުން އިތުުރުކުރުމުގެ ހާއްސަ ހަރަކާތެއް މިދިޔަ ބުރާސްފަތި ދުވަހު މާލޭގައި ވަނީ ފަށާފަ އެވެ.
ޕީއެންސީއަށް މެމްބަރުން އިތުރުކުރުމަށް ދައުލަތުގެ މުދަލާއި ވަސީލަތްތައް ބޭނުންކުރުމާއި މުއައްސަސާތަކަށް ނުފޫޒުފޯރުވަމުންދާ ކަމަށް ބުނެ އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން މިއަދު ވަނީ ކަންބޮޑުވުން ފާޅުކޮށް، ބަޔާނެއް ވެސް ނެރެފަ އެވެ.
ޕީއެންސީގެ އޮފީހުގައި މިރޭ އޮތް ފޯމު ހަވާލުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން އަބްދުއްރަހީމް ވަނީ އެމްޑީޕީގެ ތުހުމަތުތަކަށް ރައްދު ދެއްވާފަ އެވެ.
އަބްދުއްރަހީމް ވިދާޅުވީ ފޯޖުކޮށްގެން ސޮއި ހޯދައިގެން މީހުން އެ ޕާޓީއަށް ވައްދަން ޖެހޭ ހާލަތެއް ނެތް ކަމަށެވެ.
ހަމައެއާއެކު ސަރުކާރުގެ އޮފީސްތަކުން ޕާޓީއަށް ފޯމު ފުރާ ވާހަކައާއި، ކުންފުނިތަކުން ޕާޓީއަށް ފޯމު ފުރާކަމަށް ބުނެ ދައްކާ ވާހަކަތައް އިވިވަޑައިގަންނަވާކަން ފާހަގަކުރައްވާ އެމަނިކުފާނު ވިދާޅުވީ ސަރުކާރުގެ ވަޒީރުކަމުގައާއި ކުންފުނިތަކުގެ މެނޭޖިން ޑިރެކްޓަރު (އެމްޑީ) ކަމުގައި ތިއްބަވާނީ ޕީއެންސީގެ މެންބަރުން ކަމަށެވެ. އެހެންކަމުން ޕީއެންސީ ބޮޑުކުރުމަކީ އެ މެންބަރުންގެ ޒިންމާއެއް ކަމަށް އެމަނިކުފާނު ވިދާޅުވި އެވެ.
ހަމައެއާއެކު ޕާޓީއަށް މެންބަރުން ވެއްދުމަކީ ވަރަށް ބުރަ މަސައްކަތެއް ކަމަށާއި އެކަން އެނގޭނީ އެކަން ތަޖުރިބާ ކޮށްފައި ތިބޭ މީހުންނަށް ކަމަށް އެމަނިކުފާނު ވިދާޅުވި އެވެ.
އަބްދުއްރަހީމް ވިދާޅުވި ގޮތުގައި މިސަރުކާރު ވެރިކަމަށް އައިއިރު ޕީއެންސީގައި ތިއްބީ އެންމެ 3022 މެމްބަރުންނެވެ. އެކަމަކު މިހާރު އެ ޕާޓީއަކީ ރާއްޖޭގެ އެންމެ މެމްބަރުން ގިނަ ޕާޓީ ކަމަށާއި މިދިޔަ ދެ ދުވަހު އެކަނި ވެސް 8000 ފޯމު ޕާޓީއަށް ލިބިފައިވާ ކަމަށް އަބްދުއްރަހީމް ވިދާޅުވި އެވެ.
ރައީސް މުއިއްޒުގެ އަމާޒަކީ ޕީއެންސީއަށް 75000 މެންބަރުން ހަމަކުރެއްވުމެވެ. އެގޮތުން، މާލެ އާއި އަތޮޅު ތެރޭގައި އެ ޕާޓީއަށް މެންބަރުން ވެއްދުމުގެ މަސައްކަތް އަންނަނީ ކުރަމުންނެވެ.
މިހާތަނަށް އެ ޕާޓީއަށް 65000 މެންބަރުން ހަމަވެފައިވާ ކަމަށް އެ ޕާޓީގެ ޕީޖީ ލީޑަރު އިބްރާހީމް ފަލާހު ވަނީ އިއްޔެ ވިދާޅުވެފަ އެވެ.
އިލެކްޝަންސް ކޮމިޝަނުން އާންމުކޮށްފައިވާ މައުލޫމާތުގައިވާ ގޮތުން، މި ހިނގާ ސެޕްޓެންބަރުގެ 18ވަނަ ދުވަހުގެ ނިޔަލަށް 28983 މެންބަރުން ޕީއެންސީގައި އެބަ ތިއްބެވެ. އެއާއެކު އެ ޕާޓީއަކީ މިހާރު ރާއްޖޭގެ ތިންވަނައަށް އެންމެ ބޮޑު ޕާޓީއެވެ.
މިހާރު އެންމެ ބޮޑު ޕާޓީއަކީ އިދިކޮޅު އެމްޑީޕީ ކަމަށްވާއިރު އެ ޕާޓީގެ މެންބަރުންގެ އަދަދަކީ 50851 އެވެ.
