ފޮރިން މިނިސްޓްރީން ނެރުނު ބަޔާނެއްގައި ވަނީ އެ ޓެލެތޯން ބޭއްވީ 12 ޖޫން 2024ގައި ކަމަށެވެ. އަދި އެ ފައިސާ ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުވާ)އާ ހަވާލުކުރީ އޮގަސްޓް 20ވަނަ ދުވަހު ކަމަށް އެ ބަޔާނުގައި ވެއެވެ.
މީގެ އިތުރުން، ފޮރިން މިނިސްޓްރީގެ ބަޔާނުގައި ވަނީ، މިފަދަ ބޮޑު އަދަދެއްގެ ފައިސާ ފަލަސްތީނުގެ ރައްޔިތުންނަށްޓަކައި ދިވެހި ރައްޔިތުން ހަދިޔާކޮށްފައިވުމަކީ ފަލަސްތީނުގެ މިނިވަންކަމަށް ރާއްޖެއިން ކުރާ ތާއީދު ދައްކުވައިދޭ ކަމެއްކަމަށެވެ. އަދި އަބަދުވެސް، ގައުމާއި އެ ގަޤައުމުގެ ރައްޔިތުންނާއެކުދިވެހިން ތިބި ކަމުގެ އަލިގަދަ ހެއްކެއް ކަމަށް ވެސް އެ ބަޔާނުގައި ވެއެވެ.
އެ ފައިސާ ލިބުނުތާ ހަތަރު މަސް ވެފައިވާއިރު، މިހާތަނަށް ފައިސާ ހަވާލުނުކުރެވިވާ ނަމަ ލަސްވާ ސަބަބު ސާފުކޮށްދިނުމަށާއި އެ ފައިސާ ފަލަސްތީނަށް ރައްދުކޮށްދެވޭނެ ތާރީހެއް ސާފުކޮށްދިނުމަށް މަޖިލީހުގެ ގަލޮޅު ދެކުނު ދާއިރާގެ އެމްޑީޕީއަށް ނިސްބަތްވެވަޑައިގަންނަވާ މެންބަރު މީކާއީލް ނަސީމް ވަނީ މަޖިލީހުގެ އިދާރާގައި އެދިފަ އެވެ.
މީކާއީލް މިފަދައިން ހުށަހަޅާފައި ވީނަމަވެސް، މިދިޔަ އޮގަސްޓު މަހުގެ 20ގައި ފޮރިން މިނިސްޓްރީން ވަނީ އެ ފައިސާ ފިނޭންސް މިނިސްޓްރީއާއި މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) މެދުވެރިކޮށް، ސީދާ އަންރުއާގެ އެކައުންޓަށް ޖަމާކޮށްފައިވާ ކަމަށް މީގެ ކުރިން ވެސް ފޮރިން މިނިސްޓްރީން ބުންޏެވެ.
އެމްއެމްއޭ އަންރުވާއަށް ފައިސާ ޖަމާކުރިކަމުގެ "ޑެބިޓު އެޑްވައިޒު" ގެ ކޮޕީ --
ރައީސް މުހައްމަދު މުއިއްޒުގެ އިސްނެންގެވުމަކަށް އެ ޓެލެތޯން ޕީއެސްއެމުން ކުރިއަށް ގެންދިޔައީ މިދިޔަ 12 ޖޫންގަ އެވެ. އެއް ދުވަހަށް ކުރިއަށް ގެންދިޔަ އެ ޓެލެތޯނަށް ކުންފުނިތަކާއި ސަރުކާރުގެ އެކި އިދާރާތަކުން ބޮޑެތި އަދަދުތަކުން ފައިސާގެ އެހީ ދިންއިރު، އާއްމުންގެ ގިނަ ބަޔަކު ވެސް ފައިސާ ހަދިޔާ ކުރި އެވެ.
