މިއަދު ފަތިހު 5:30 އިން ފެށިގެން މެންދުރު 11:30 އާ ހަމައަށް ހއ. އަތޮޅުން ފެށިގެން ވ. އަތޮޅާ ހަމައަށް ވައިޓް އެލާޓެއް ނެރެފައިވާ ކަމަށް މޫސުމާބެހޭ އިދާރާއިން ބުނެފި އެވެ. އަދި މި ސަރަހައްދުތަކުގައި ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައި ޖަހާނެ ކަމަށް އެ އިދާރާއިން މައުލޫމާތު ދިނެވެ.
މޫސުމާބެހޭ އިދާރާއިން ބުނީ މި ސަރަހައްދުތަކުގެ ކަނޑުތައް ގަދަވާނެ ކަމަށެވެ. އަދި މި ސަރަހައްދުތަކުގައި ދަތުރުކުރާ އުޅަނދުފަހަރުގެ ފަޅުވެރިން މޫސުމަށް ސަމާލުވުމަށް އިލްތިމާސް ކޮށްފި އެވެ.
މޫސުން ގޯސްވެ، ކަނޑު ގަދަވުމުގެ ސަބަބުން މިދިޔަ އަހަރުވެސް އެތައް އުޅަނދެއް ހާދިސާތަކާ ކުރިމަތިވި އެވެ. އެހެންކަމުން މޫސުމަށް ސަމާލުވެ، ރައްކާތެރިކަމުގެ ފިޔަވަޅުތައް އެޅުމަށް މަސްވެރިންނާއި އެހެނިހެން އުޅަނދުފަހަރުގެ ވެރިންނަށް މޫސުމާބެހޭ އިދާރާއިން އިލްތިމާސް ކުރި އެވެ.
