މަޖިލީހުގެ ތަޅުމުގައި ނެގުނު ވޯޓުގައި ބައިވެރިވި 79 މެންބަރުން ވެސް ވަނީ އަޒީމާ އެ މަގާމަށް އައްޔަންކުރުމަށް ތާއީދުކޮށްފަ އެވެ. މިއީ މަޖިލީހުގެ ހާރިޖީ ގުޅުންތަކުގެ ކޮމިޓީން ހުށަހެޅި ރިޕޯޓާ އެއްގޮތަށް ނެގުނު ވޯޓެކެވެ.
އަޒީމާއަކީ 1988 އިން ފެށިގެން ފޮރިން މިނިސްޓްރީގެ އެކި މަގާމުތަކުގައި މަސައްކަތްކުރައްވާފައިވާ ބޭފުޅެކެވެ. އޭގެ ތެރޭގައި 2019 އިން 2023 އަށް ޗައިނާގައި ހުންނަ ރާއްޖޭގެ ސަފީރުކަން ވެސް ހިމެނެ އެވެ. މިހާރު އަޒީމާ ހުންނެވީ ފޮރިން މިނިސްޓްރީގެ އިންޑިއާ ޑިވިޝަންގެ ހެޑްގެ މަގާމުގަ އެވެ.
އިންޑިއާގެ ސަފީރުކަމަށް އަޒީމާ ހަމަޖެއްސުމަށް ހުށަހެޅީ މިހާރުގެ ސަފީރު އިބްރާހިމް ޝަހީބުގެ ދައުރު ހަމަވާތީ އެވެ. ޝަހީބު އެ މަގާމަށް އައްޔަންކުރީ 2022 ވަނަ އަހަރުގެ ނޮވެމްބަރު މަހު އެވެ. ފޮރިން ސަރވިސް ގާނޫނުގެ ދަށުން ސަފީރުންގެ ދައުރަކީ ތިން އަހަރު ދުވަހެވެ.
