ރައްޔިތުންގެ މަޖިލީހުގެ ތިމާވެށްޓާއި މޫސުމީ ބަދަލުތަކާ ގުޅޭ ކޮމިޓީއާ އެކު ބޭއްވި ބައްދަލުވުމެއްގައި އޭޖީ އޮފީހުގެ ކައުންސެލް ޖެނެރަލް ފާތިމަތު ހަލީމް ވިދާޅުވީ މިހާރު އަމަލުކުރަމުން އަންނަނީ 1993 ވަނަ އަހަރު ހެދި ގާނޫނުގެ ދަށުން އެކުލަވާލި ގަވާއިދަކަށް ކަމަށެވެ.
އޭޖީ އޮފީހުން ބުނީ ފަރަށް އަރާ ބޯޓުތަކުން ޖޫރިމަނާ ނުދައްކާ މައްސަލަ އިތުރުވަމުން އަންނަ ކަމަށާއި، މިކަމަށް ހައްލެއް ހޯދުމަށް ގާނޫނަށް އިސްލާހުތަކެއް ގެންނަން ޖެހޭ ކަމަށެވެ. އަދި މިހާރު އޮތް ގާނޫނުގައި ޖޫރިމަނާ ނުދައްކާ ބޯޓުތައް ހިފެހެއްޓޭނެ އެއްވެސް ގޮތެއް ނެތް ކަމަށް ވެސް އެ އޮފީހުން ބުނެފައިވެ އެވެ.
ފާތިމަތު ހަލީމް ވިދާޅުވީ ރާއްޖޭގެ ބޯޓުފަހަރުން ޖޫރިމަނާ ދެއްކުމުގައި އެއްބާރުލުން ލިބުނު ނަމަވެސް، ބޭރުގެ ބޯޓުފަހަރުން ޖޫރިމަނާ ދެއްކުމަށް ދެކޮޅު ހަދާ ކަމަށެވެ. އަދި ގިނަ ފަހަރަށް ޖޫރިމަނާ ނުދައްކާ ފުރައިގެން ދާ ކަމަށް ވެސް އޭނާ ވިދާޅުވި އެވެ.
އޭޖީ އޮފީހުން ބުނީ މި މައްސަލައަށް ދާއިމީ ހައްލެއް ހޯދުމަށް ކަމާ ގުޅޭ އިދާރާތަކާ އެކު މަޝްވަރާކޮށް، ގާނޫނަށް ގެންނަން ޖެހޭ އިސްލާހުތައް ގެނައުމުގެ މަސައްކަތް ކުރަމުން އަންނަ ކަމަށެވެ.
