ރައީސް އޮފީހުގައި ނޫސްވެރިންނާއި ބައްދަލުކުރައްވާ ވާހަކަ ދައްކަވަމުން ބަންޑާރަ ނައިބު އުޝާމް ވިދާޅުވީ ރާއްޖޭގައި ވަރަށް ފުޅާ ދާއިރާއެއްގައި ޖުވާކުޅުން ފަދަ ކަންކަން ކުރަމުން އަންނަކަން ފާހަގަކުރެވިފައިވާކަމަށެވެ.
އެ ކަންކަން ހުއްޓުވޭނީ ގާނޫނު އިސްލާހު ކޮށްގެން ކަމެއް ކަމަށް ގަބޫލު ކުރައްވާކަމަށް ވިދާޅުވެ އުޝާމް ވިދާޅުވީ ވެބްސައިޓްތަކާއި އެޕްތައް ބޭނުންކޮށްގެން ޖުވާ ކުޅުން ނުވަތަ ބެޓްކުރުން ހުއްޓުވަން ގާނޫނުތަކަށް އިސްލާހު ގެންނާނެކަމަށެވެ.
އިސްލާމް ދީނުގެ އުސޫލުތަކާއި ހިލާފު ވެބްސައިޓްތައް ބްލޮކް ކުރަން ސަރުކާރުން ވަނީ ފަށާފައެވެ. މި މަސައްކަތުގެ ދަށުން ޖުވާ ކުޅެން ރާއްޖޭގައި އާންމުކޮށް ބޭނުންކުރާ ވެބްސައިޓްތަކެއް ބްލޮކް ކޮށްފައިވާކަމަށް ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) ބުނެއެވެ. މިދިޔަ ޖުލައި މަހު މި ސައިޓްތައް ބްލޮކް ކުރީ ފުލުހުން އަންގައިގެންކަމަށް ކޭމުން ވަނީ ބުނެފައެވެ.
