ރައީސް މިފަދައިން އިލްތިމާސްކުރެއްވީ، ދަރުބާރުގޭގައި މިއަދު ހެނދުނު ކުރިއަށް ދިޔަ، ދިވެހިރާއްޖޭގެ ގައުމީ ޔުނިވާސިޓީގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި، ވާހަކަފުޅުދައްކަވަމުންނެވެ.
ރައީސް ދެއްކެވި ވާހަކަފުޅުގައި، ދަސްވެނިންނަށް މިއަދު ލިބުނު ކާމިޔާބަކީ އެތައް ދުވަހެއްގެ މަސައްކަތާއި ގުރުބާނީކަން ފާހަގަކުރައްވައި، އެއީ އެކަމަކަށް މަސައްކަތްކުރާ އަޅުންނަށް މާތް ﷲ ތަނަވަސްކޮށްދެއްވާ ރަހުމަތެއްކަން ހަނދާންކޮށްދެއްވި އެވެ. އަދި މި ނަތީޖާއާއެކު އަމިއްލަ ދިރިއުޅުން އާރާސްތުކޮށް، ގައުމަށް ކޮށްދެވެން އޮތް ކަމެއްގައި ކުރިއަރާ ދިއުމުގެ އަޒުމު ވަރުގަދަ ކުރުމަށްވެސް އެމަނިކުފާނު ހިތްވަރުދެއްވި އެވެ.
ރައީސްގެ ވާހަކަފުޅުގައި، ޤައުމެއް ކުރިއަރާ ދާނީ މައިގަނޑު 2 ގޮތަކުން ކަމަށާއި، އެއީ ފިކުރީ ގޮތުންނާއި ފެންނަން ހުންނަ ކަންކަމުން ހޯދައިގަންނަ ކުރިއެރުމުގެ ތެރެއިންކަން ފާހަގަކުރައްވަމުން އެމަނިކުފާނު ވަނީ މި ރޮނގުން މިއަދު ރާއްޖެ ހޯދަމުންދާ ކުރިއެރުންތަކުގެ މައްޗަށްވެސް އަލިއަޅުއްވާލައްވާފަ އެވެ. އެގޮތުން، ރައްޔިތުން ގެދޮރުވެރިކުރުވުމަށް، ބޯހިޔާވަހިކަމުގެ ދާއިރާގައި އެކަނިވެސް 2.5 ބިލިއަން ރުފިޔާގެ ބަޖެޓެއް އިއުލާންކޮށް، އެކަމުގެ މަސައްކަތްތައް ކުރިއަށްދާކަން ރައީސްގެ ވާހަކަފުޅުގައި ފާހަގަކުރެއްވި އެވެ.
މި މޭރުމުން ވާހަކަފުޅުދައްކަވަމުން ރައީސް ވަނީ، އިގުތިސާދު ފުޅާކޮށް، މަތީ ތައުލީމުގެ ބަހާ އިތުރަށް ތަނަވަސް ކުރަމަށް މިހާރުވެސް ގިނަ މަސައްކަތްތަކެއް ކުރަމުންދާކަން ފާހަގަކުރައްވާފަ އެވެ. އެގޮތުން ޔުނިވާސިޓީގެ ތަމްރީނު ރިޒޯޓް ތަރައްގީ ކުރުމާއި، ފަންނުވެރި އިގުތިސާދެއް ފުޅާކުރުމާއި، އަދި ގޮންޖެހުންތަކާއި އެކުގައިވެސް ޒުވާނުންނަށް ކުރިއެރުން ކަށަވަރުކޮށްދިނުމަށް ދައުލަތުގެ ފެންވަރުގައި، އަދި ބައިނަލްއަގުވާމީ ފެންވަރުގައި ކުރެވެމުންދާ މަސައްކަތްތައް ރައީސް ފާހަގަކުރެއްވި އެވެ.
ދަރިވަރަކަށް، ރައީސް ޑރ. މުހައްމަދު މުއިއްޒު އިނާމު ހަވާލުކުރައްވަނީ-- ފޮޓޯ: ރައީސް އޮފީސް
ތިން ސަތޭކައަށްވުރެ ގިނަ ދަރިވަރުން ގްރެޖުއޭޓްވި ހަފުލާގައި ރައީސް ވަނީ، ސިވިލް އިންޖީނިއަރިންގެ ދާއިރާއިން އެ މަނިކުފާނު ޕީއެޗްޑީ ހާސިލްކުރައްވަން އުޅުއްވި ދުވަސްވަރުގެ ތަޖުރިބާ ހިއްސާކުރައްވައިފަ އެވެ.
އެ މަނިކުފާނު ވިދާޅުވީ ޑިގްރީން ފެށިގެން ޕީއެޗްޑީއާ ހަމައަށް އިނގިރޭސިވިލާތުގައި ހޭދަކުރެއްވި އަށް އަހަރު އެކި ތަޖުރިބާތަކާ ކުރިމަތިވެވަޑައިގަތް ކަމަށެވެ. އެއީ ވަރަށް ދަތި ދުވަސްވަރަކަށް ވިއަސް ކާމިޔާބު ހާސިލްވީ ނުގުޑާ އަޒުމާއި އެތައް ބައެއްގެ އެހީގައިކަން ފާހަގަކުރެއްވި އެވެ.
ރައީސް ވަނީ، ގައުމީ ވިސްނުމުގައި ބައިވެރިވުމަށް އެދިވަޑައިގެންފަ އެވެ. އަދި މުހިންމީ އަމިއްލަ ސިކުނޑިން ވިސްނައިގެން ވަމުންދާ ގޮތް ދެނެގަތުން ކަމަށާއި، އެ މޭރުމުން ކަންކުރުމުން، ހަގީގަތް ސާފުވެގެންދާނެކަން އެމަނިކުފާނު ފާހަގަކުރެއްވި އެވެ.
އެ މަނިކުފާނު ވިދާޅުވީ ވަރުގަދަ އަޒުމަކާއި ހިންމަތާއެކު އެ މީހަކު ދާން ބޭނުންވާ ހިސާބަށް ދިއުމަށް މަސައްކަތްކުރުން ނަތީޖާ ރަނގަޅުވާނޭ ކަމަށެވެ. އެ ނަތީޖާގެ މައްޗަށް އެ މީހާ އިތުރު ހިތްވަރަކާ އެކީގައި ދެން އޮތް ހަރުފަތަކަށް ދިއުމަށް މަސައްކަތް ކުރަންޖެހޭނެކަން ފާހަގަކުރެއްވި އެވެ.
