ބުޅާ ޝެލްޓަރު ހަދާފައިވަނީ ހުޅުމާލޭ ދެވަނަ ފިޔަވަހީގެ ފަރުކޮޅުފުށި ސަރަހައްދުގައެވެ. މި ފެސިލިޓީ އަޅާފައިވަނީ 5000 އަކަފޫޓުގެ ބިމެއްގައެވެ.
ބުޅާ ފެސިލިޓީ މަދަމާ ހުޅުވާނެކަމަށް ދަނޑުވެރިކަމާއި ދިރޭތަކެތި ބެލެހެއްޓުމާ ބެހޭ މިނިސްޓްރީން ވަނީ ބުނެފައެވެ. މާލޭ ސިޓީ ކަައުންސިލުން އިއްޔެ ވަނީ ނޫސްވެރިން މި ފެސިލީޓީއަށް ގެންގޮސް އެތަން ދައްކާލަފައެވެ.
މޭޔަރު އާޒިމް ވިދާޅުވީ ބުޅާ ޝެލްޓަރު ހުޅުވުމަށްފަހު 6 މަސްދުވަހުގެތެރޭގައި މާލޭގެ މަގުތަކުގައި އުޅޭ ބުޅާތައް ނަގާ އެތަނަށް ގެންދާނެކަމަށެވެ. އަދި އެންމެ ފުރަތަމަ އެތަނަށް ގެންދާނީ ސަލްމާން މިސްކިތް ކައިިރީ އުޅޭ ބުޅާތައްކަމަށްވެސް އާޒިމް ވިދާޅުވިއެވެ.
ކެޓް ޝެލްޓަރަށް ގެންދަން މާލޭގެ މަގުތަކުން ބުޅާތައް ނެގުމަކީ ވަރަށް ޓެކްނިކަލް މަސައްކަތެއްކަން ފާހަގަކުރައްވަމުން އާޒިމް ވިދާޅުވީ އެކަމަށް އެ ކައުންސިލުން ތައްޔާރުވަމުން އަންނަކަމަށެވެ. އެގޮތުން އެއްވެސް ބުޅަލަކަށް އަނިޔާއެއް ނުވާނޭ ގޮތަށް އެކަން ކުރުމަށް ހާއްސަ ބައެއް ތަކެތި ތައްޔާރުކުރަމުން އަންނަކަމަށްވެސް މޭޔަރު އާޒިމް ވިދާޅުވިއެވެ.
ކެޓް ޝެލްޓަރު ނިންމުމުގެ އެންމެ ފަހުގެ މަސައްކަތްތަކުގެ ތެރެއިން
ބުޅާ ސެލްޓަރަށް ގެންދާ ބުޅާތަކަށް ބޭނުންވާ ހިދުމަތްތައް އެތަނުން ދޭނެކަމަށް މޭޔަރު ވަނީ ވިދާޅުވެފައެވެ. އަދި ކެޓް ޝެލްޓަރު ތައްޔާރުކޮށްފައިވަނީ އެތަނަށް ގެންދެވޭ ބުޅާތަކުގެ ތެރެއިން ސިއްހީ ހާލަތު ރަނގަޅު ނޫން ތަކެއްޗަށް ފަރުވާދެވޭން ވަކިން ބޭތިއްބޭ ގޮތަށްކަމަށްވެސް އާޒިމް ވިދާޅުވިއެވެ.
އާޒިމް ވިދާޅުވީ ބުޅާ ޝެލްޓަރު ހުޅުވުމުން އެތަނުގައި ހިލޭ ސާބަހަށް މަސައްކަތް ކުރަން ބޭނުންވާ ފަަރާތްތަކަށް އެ ފުރުސަތު ހުޅުވާލާނެކަމަށެވެ.
ބުޅާ ޝެލްޓަރަށް ބޭނުންވާ ވެޓެރިނޭރިއަނަކާއި ދެ ނަރުހުން ހޯދުމަށް މާލެ ސިޓީ ކައުންސިލުން އިއުލާންކުރިއެވެ. ވެޓެރިނަރީ ޑޮކްޓަރުގެ މުސާރައަކީ 35،000 ރުފިޔާ އަދި ވެޓެރިނަރީ ނަރުހުންގެ އަސާސީ މުސާރައަކީ 8،130 ރުފިޔާ އެވެ. މީގެ އިތުރުން ސަރވިސް އެލަވަންސްގެ ގޮތުގައި މަސައްކަތްކުރާ ކޮންމެ ދުވަހަކަށް 100 ރުފިޔާ ދޭނެ ކަމަށް ކައުންސިލުން ބުނެފައިވެ އެވެ.
ބުޅާ ޝެލްޓަރުން ބުޅަލަށް އާންމު ޗެކަޕްތަކާއި، ފަރުވާތަކާއި، އަދި އޮޕަރޭޝަންތައް ކުރެވޭނެ އެވެ. އަދި ބުޅަލަށް ބޭސް ދިނުމާއި، ކާންދިނުމާއި، ބޭސްއެޅުމުގެ އިތުރުން އިންޖެކްޝަން ޖެހުމާއި، ލޭ ނެގުމާއި، ކުޑަކަމުދާ ތަކެތި ޓެސްޓްކުރުން ފަދަ ހިދުމަތްތައް ލިބޭނެ ކަމަށް ވެސް ކައުންސިލުން މައުލޫމާތު ދީފައިވެ އެވެ.
