ޕައިޕޯޓާ ރަށުގައި ހިނގި މި ހާދިސާގައި އެ މީހުން ރަސްގެފާނާއި ދިމާލަށް ޗަކަ އުކުމުގެ ކުރިން ވަނީ އޭނާ އަކީ "މީހުންމަރާ މީހެއް" ކަމަށް ބުނެ ހަޅޭލަވާފައެވެ. މި ހާދިސާގައި ސްޕެއިންގެ ބޮޑުވަޒީރު ޕެޑްރޯ ސަންޗެޒްގެ ކާރަށްވެސް ގައު އުކައި، އަވަސް އަވަހަށް އެތަނުން އޭނާ ގެންދަން ޖެހުނެވެ.
ފެންބޮޑުވުމުގެ ސަބަބުން މިހާތަނަށް 217 މީހުން މަރުވެފައިވާއިރު، އިތުރު ގިނަ ބަޔަކު ގެއްލިފައިވާ ކަމަށް ސަރުކާރުން ބުނެ އެވެ. ރައްޔިތުން ރުޅިއައީ ފެންބޮޑުވާނެ ކަމުގެ އިންޒާރު ނުދިނުމާއި، ސަރުކާރުން އެކަށީގެންވާ އެހީތެރިކަން ނުދޭތީ އެވެ.
"އަހަރެމެންގެ ވިޔަފާރިތަކާއި، ގެދޮރާއި، ހުރިހާ އުއްމީދުތަކެއް ގެއްލިއްޖެ. އަހަރެމެން މަރުވާން ދޫކޮށްލީ،" އެއް އަންހެނަކު ބުންޏެވެ.
މި ހާދިސާއާ ގުޅިގެން ސްޕެއިން ސަރުކާރުން ވަނީ 10،000 އަސްކަރީންނާއި ސިފައިން އެ ސަރަހައްދަށް ފޮނުވާފަ އެވެ.
ސްޕެއިންގެ ރަސްގެފާނު ފަހުން އިންސްޓަގްރާމްގައި ކުރެއްވި ޕޯސްޓެއްގައި ވަނީ މުޒާހަރާކުރި މީހުންގެ ރުޅިވެރިކަމާއި ހިތްހަމަނުޖެހުން އެމަނިކުފާނަށް ވިސްނިވަޑައިގަންނަވާ ކަމަށް ވިދާޅުވެފައެވެ.
