އޮސްޓްރޭލިއާގެ ސިޑްނީގައި ހިނގަމުންދާ ކޮމަންވެލްތު ޕާލަމެންޓްރީ އެސޯސިއޭޝަން ކޮންފަރެންސްގައި ވާހަކަދައްކަމުން ނާޒިމް ވިދާޅުވީ، ޕްރައިމަރީ ސްކޫލުން ފެށިގެން މަތީ ސާނަވީ އަށް މީޑިއާ ލިޓަރަސީ ކިޔަވައިދިނުމަށް މަންހަޖެއް އެކުލަވާލަން ޖެހޭ ކަމަށެވެ. އަދި މިކަމަށް ބޭނުންވާ ޓީޗަރުން ތަމްރީނު ކުރުމަށް ކޮމަންވެލްތު ގައުމުތަކުގެ ޕާލަމެންޓުތަކުން އެހީތެރިވާން ޖެހޭ ކަމަށް އޭނާ ބުނި އެވެ.
ނާޒިމް ހުށަހެޅި ގޮތުގައި، މި މަންހަޖު އެކުލަވާލުމަށް ކޮމަންވެލްތު ޕާލަމެންޓްރީ އެސޯސިއޭޝަނުން ވޯކިން ގްރޫޕެއް އުފައްދަން ޖެހެ އެވެ. އަދި މި މަސައްކަތުގައި ދިވެހިރާއްޖެއިން ފުރިހަމައަށް ބައިވެރިވާނެ ކަމުގެ ޔަގީންކަން އޭނާ ދިނެވެ.
ނާޒިމް ވިދާޅުވި ގޮތުގައި މީސްމީޑިއާގައި ފެތުރޭ ދޮގު މައުލޫމާތަކީ، ހަގީގީ ތެދު މައުލޫމާތަށް ވުރެ ހަ ގުނަ ބާރަށް ފެތުރޭ މައުލޫމާތެވެ. އެހެންކަމުން މިކަމާ ދެކޮޅަށް މަސައްކަތް ކުރުމަށް ކޮންމެ ގޭބިސީއެއްގައި މައުލޫމާތު ފާރަވެރިއެއް ބެހެއްޓުމަށް އޭނާ ހުށަހެޅި އެވެ.
