އިއްޔެ ހިނގި މި ހާދިސާގައި މަރުވެފައިވަނީ ޖެނާ ޗެން ކިޔާ ސިންގަފޫރް އަންހެން ކުއްޖެކެވެ. ސިންގަޕޫރުގެ އެސްޓީ ޖޯސެފްސް އިންސްޓްޓިއުޓް (އެސްޖޭއައި) ކިޔަވަމުން އަންނަ 15 އަހަރުގެ ޖެނާ ރާއްޖެ އައިސް އުޅެނީ ސްޓަޑީ ޓްއާއެއްގައިކަމަށް ފުލުހުން ވަނީ ބުނެފައެވެ.
އެ ދަތުރަކީ އެ ސްކޫލުގެ ސާނަވީ ގްރޭޑްގެ "ނެޝަނަލް ޔޫތު އެޗީވްމެންޓް އެވޯޑް" ޕްރޮގްރާމެއްގެ ދަށުން ކުރަމުން އަންނަ ދަތުރެކެވެ. މި ޕްރޮގްރާމްގެ ދަށުން މިދިޔަ އަހަރުވެސް އެ ސްކޫލުގެ ދަރިވަރުންތަކެއް ރާއްޖެ ވަނީ އައިސްފައެވެ.
މި ހާދިސާ ހިނގި ގޮތް ބެލުމަށް އެކުއްޖާ ނިސްބަތްވާ ސިންގަޕޫރޫގެ ޓީމެއް ރާއްޖެ އައިސްފައިވަނީ މިއަދުގެގެ ވަގުތެއްގައެވެ. މި ޓީމުގައި އެ ކުއްޖާގެ އާއިލާ ބައެއް މީހުންނާއި އެ ކުއްޖާ ކިޔަވަމުން އަންނަ ސްކޫލްގެ ބައެއް އިސްވެރިންވެސް ވަނީ ރާއްޖެ އައިސްފައެވެ.
އެނގިފައިވާ ގޮތުގައި މި ކުއްޖާ މަރުވީ ސްނޯކުލް ކުރުމަށް ދޯނިން މޫދަށް ފުންމާލި ވަގުތު، ދޯނީގެ ބުރަފަތީގައި ޖެހިގެންނެވެ. އަދި މަރުވީ އެ ކުއްޖާގެ ހަށިގަނޑުގެ ވަރަށް ގިނަ ތަންތަން ކަފައިގެން ގޮސް ލޭ މަނާ ނުވެގެންކަމަށް އެނގިފައިވެއެވެ. އެ ކުއްޖާއަށް ފަރުވާދިނުމަށް ދިގުރަށަށް ގެންދިޔައިރުވެސް މަރުވެފައިވާކަމަށް އެރަށު މީހުން ބުނެއެވެ.
އިއްޔެ ހެނދުނު ހިނގި މި ހާދިސާއާ ގުޅޭގޮތުން ފުލުހުން އަދި އެއްޗެއް ބުނެފައެއް ނުވެއެވެ.
