Advertisement

ލަނޑާ ނަގާ ދޯންޏެއްގައި ހިނގި ދެބަސްވުމެއްގެ ތެރެއިން ރ. މަޑުއްވަރީ، ފެހިއަލި، އިސްމާއިލް ހައްމާދަށް ހަމަލާދިންކަމުގެ ތުހުމަތުގައި ހައްޔަރުކޮށްފައިވާ އިސްމާއިލް އާސިފްގެ ބަންދުގެ މުއްދަތު އިތުރުކޮށްފިއެވެ.

އާސިފްގެ ބަންދުގެ މުއްދަތު އިތުރު ކުރުމަށް ކްރިމިނަލް ކޯޓަށް ގެންދިއުމުން އޭނާގެ ބަންދަށް 10 ދުވަސް ވަނީ ޖަހާދީފައެވެ. އާސިފްގެ ބަންދުގެ މުއްދަތު އިތުރު ކުރުމަށް ކްރިމިނަލް ކޯޓުން ކުރި އަމުރުގައި ބުނެފައި ވަނީ ޖިނާއީ އިޖުރާތުގެ ގާނޫނުގެ 60 ވަނަ މާއްދާގެ (ށ) އަށް ރިއާޔަތްކޮށް، މުޖްތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ބެލެވޭތީ އޭނާ ބަންދުގައި ބެހެއްޓުމަށް އަމުރު ކުރާ ކަމަށެވެ.

ހައްމާދަށް އާސިފް ހަމަލާދިނީ މިދިޔަ މަހުގެ 21 ވަނަ ދުވަހުގެ ރޭގެ ވަގުތެއްގަ އެވެ. އޭނާ އަށް ހަމަލާދީފައިވަނީ ދީނީ ހިޔާލުތަފާތުވެ ވެވުނު ދެބަސްވުމެއްގެ ތެރެއިންނެވެ. އޭނާ އަށް ތޫނު އެއްޗަކުން ހަމަލާދިން މައްސަލާގައި އާސިފް ހައްޔަރު ކުރީ މިދިޔަ މަހުގެ 23 ވަނަ ދުވަހުއެވެ. އާސިފް އަކީ ވެސް މަޑުއްވަރީ އަށް ނިސްބަތްވާ އުމުރުން 30 އަހަރުގެ މީހެކެވެ.

މި މައްސަލާގައި އަނިޔާވި ހައްމާދުވެސް ފަރުވާއަށްފަހު މިހާރު ވަނީ ފުލުހުން ހައްޔަރުކޮށްފައެވެ. ހައްމާދު ހައްޔަރުކޮށްފައި ވަނީ 13 އަހަރުގެ އަންހެން ކުއްޖެއް ރޭޕް ކުރި ކަމުގެ ކުށުގައެވެ. ހައްމާދުގެ ބަންދަށް މި މަހުގެ 15ވަނަ ދުވަހު ވަނީ 15 ދުވަސް ޖަހާދީފައެވެ.