އާސަންދައިގެ އާ އޮފީސް އިމާރާތް އެޅުމުގެ މަސައްކަތް ނޯތު ކޯސްޓް ކޮންސްޓްރަކްޝަނާ ހަވާލުކޮށްފައިވަނީ 147 މިލިއަން ރުފިޔާއަށެވެ. އަދި މި މަސައްކަތުގެ އެޑްވާންސްގެ ގޮތުގައި 2023 ވަނަ އަހަރު ދެ ފަހަރެއްގެ މަތިން 44 މިލިއަން ރުފިޔާ އެ ކުންފުންޏަށް ދީފައިވާތީ އެ މައްސަލަ ފުލުހުންނަށް ހުށައަޅަން ރައްޔިތުން މަޖިލީހުގެ މާލިއްޔަތު ކޮމެޓީން ވަނީ ނިންމާފައެވެ.
މި މައްސަލާގައި މިއަދު ބޭއްވި މާލިއްޔަތު ކޮމިޓީއަށް ހަމީދު ހާޒިރުކޮށްވަނީ ސުވާލުކޮށްފައެވެ. އެ ސުވާލުތަކަށް ޖަވާބު ދެމުން ހަމީދު ވިދާޅުވީ އެކަމުގައި އެއްވެސް މައްސަލައެއް ކޮރަޕަޝަނެއް ނޯންނާނެކަމަށެވެ. އަދި ބަދަލު ދިނުމުގެ ހުރިހާ މަރުހަލާއެއް ނިމިގެން ދިޔައިރު ވެސް ކޮރަޕްޝަނަށް މަގުފަހިވާ ކަމަށް، އެއްވެސް މުއައްސަސާއަކުން އަންގާފައިނުވާ ކަމަށްވެސް ހަމީދު ވިދާޅުވިއެވެ.
ހަމީދު ވިދަޅުވީ ސެޓްލްމެންޓް މަރުހަލާގައި އާސަންދަ ކުންފުނިން އެ މައުލޫމާތު އޭސީސީއަށް ހިއްސާކުރިކަމަށެވެ. އަދި އެ މައުލޫތު ހުށައެޅުމުން އޭސީސީން އަންގާފައިވަނީ ބަދަލު ދޭން ޖެހޭނެ ކަމަށްކަމަށް ހަމީދު ވިދާޅުވިއެވެ. އޭގެއިތުރުން އިންޑެޕެންޑެންޓް ލޯ ފާމަކުންވެސް އަދި އެޓާނީ ޖެނެރަލްގެ އޮފީހުން ދިން ލަފާގައިވެސް އެ ކުންފުންނަށް ބަދަލު ދޭންޖެހޭކަން އަންގާފައިވާކަމަށްވެސް ހަމީދު ވިދާޅުވިއެވެ.
މަޝްރޫއުގެ އެޑްވާންސް ފައިސާ އަކީ ދެ އަގެއް ހުށަހަޅައިގެން، އާސަންދައިގެ ރުހުން ލިބިގެން ދީފައިވާ އަދަދެއް ކަމަށާއި އެފައިސާ ހޯދާފައިވަނީ ވެސް ފައިނޭންޝަލް ސެކިއުރިޓީ ބަހައްޓައިގެން ކަމަށްވެސް ހަމީދު މިއަދު ކޮމެޓީގައި ވަނީ ވިދާޅުވިއެވެ.
2016 ވަނަ އަހަރު އާސަންދައިގެ ހޮސްޕިޓަލެއް އެޅުމަށް 61 މިލިއަން ރުފިޔާއަށް އެ ކުންފުންޏާ މަސައްކަތް ހަވާލުކުރި ނަމަވެސް، އާސަންދައަށް ކުރިމަތިވި މާލީ ދަތިތަކާ ހެދި އެ މަސައްކަތް މަޑުޖައްސާލަން ޖެހުނެވެ. އޭގެ ފަހުން ނިމިދިޔަ ސަރުކާރުގައި ބަދަލު ދިނުމަށް އެކުލަވާލި ކޮމިޓީއަށް މައްސަލަ ހުށަހެޅުމުން، ރައީސް އޮފީހުން ވަނީ އާސަންދައިގެ އާ އޮފީސް އިމާރާތް އެޅުމުގެ މަސައްކަތް އަލުން އެ ކުންފުންޏާ ހަވާލުކުރަން ނިންމާފަ އެވެ.
