ސަރުކާރަށް އެއް އަހަރު ފުރުމާ ގުޅޭ ގޮތުން ޕީއެސްއެމްގެ ޕްރޮގްރާމެއްގައި އެ މިނިސްޓްރީގެ މަސައްކަތްތަކާ ގުޅޭ ތަފުސީލު ދެއްވަމުން ހޯމްލޭންޑް މިނިސްޓަރު އަލީ އިހުސާން ވިދާޅުވީ، ބިދޭސީންގެ މައުލޫމާތު އެއްކުރުމަށް ކުރިއަށްގެންދާ މި މަސައްކަތް އަންނަ އަހަރުގެ އެޕްރީލް މަހުގެ ނިޔަލަށް ނިންމުމަށް މަސައްކަތް ކުރަމުންދާކަމަށެވެ.
އިހުސާން ވިދާޅުވީ، ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރިއަށްގެންދާ އޮޕަރޭޝަން ކުރަނގި ރާއްޖޭގެ 138 ރަށެއްގައި މިވަގުތު ކުރިއަށްދާކަމަށެވެ. އަދި މީގެ ތެރެއިން 10،000 އަށްވުރެ ގިނަ ބިދޭސީންގެ ބަޔޯމެޓްރިކްސް ނެގިފައިވާކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ގަވާއިދާ ހިލާފަށް ރާއްޖޭގައި ވިޔަފާރިކުރަމުންދިޔަ 5000 އެއްހާ ބިދޭސީން މިހާރު ރައްޖެއިން ފުރުވާލާފައިވާކަމަށެވެ. އެހެންކަމުން މިދާއިރާއިން ބޮޑު ބަދަލަކާ ދިމާއަށް ދިޔުމަށް ކުރަމުންދާ މަސައްކަތްތަކުގެ ތެރެއިން ރަނގަޅު މިސްރާބަކަށް މަސައްކަތްކުރެވެމުންދާކަމަށް މިނިސްޓަރު ވިދާޅުވި އެވެ.
ބިދޭސީންގެ ފިންގަޕްރިންޓާއި ފޮޓޯ ނަގައި، ގަވާއިދަށް ފެއްތުމުގެ މަސައްކަތް ނިމޭއިރު، މައުލޫމާތު ކަށަވަރު ނުވާ އެއްވެސް ބިދޭސީއަކު ރާއްޖޭގައި ނުހުންނާނެ ކަމަށް އިހުސާން ވަނީ ކުރިން ވިދާޅުވެފަ އެވެ. ތިން އަހަރަށް އަމާޒުކޮށްގެން ކުރިއަށް ގެންދާ އެ އޮޕަރޭޝަން ނިމޭއިރު، ސަރުކާރުގެ އަމާޒަކީ ރާއްޖޭގައި މުޅިން ވެސް ތިބޭނީ 100 ޕަސެންޓް ވެރިފައި ކުރެވިފައިވާ ބިދޭސީން ކަމަށް ހެދުމެވެ.
