އެމްޖޭއޭގެ ސެކްރެޓަރީ ޖެނެރަލް އަހުމަދު ނާއިފް މިއަދު ވިދާޅުވީ މީޑިއާތަކުން ބޭނުންވާ ނަމަ، މިހާރު މީޑިއާތައް ރެގިއުލޭޓް ކުރުމުގައި ގެންގުޅޭ މެކޭނިޒަމް އެއްކޮށް އުވާލުމަކީ އޭޖީގެ ވިސްނުން ކަމަށެވެ. މިއީ އޭޖީ އުޝާމްއާ އެކު ބޭއްވި ބައްދަލުވުމެއްގައި ހިއްސާކުރި މައުލޫމާތެކެވެ.
މި ބައްދަލުވުމުގައި އޭޖީ އުޝާމް ވަނީ މީޑިއާތައް ހިންގުމަށާއި ނޫސްވެރިކަމަށް ސަރުކާރުން ނުފޫޒު ނުފޯރުވާނެ ކަމުގެ ޔަގީންކަން ދެއްވާފައެވެ. ނަމަވެސް މަޖިލިސް މެންބަރު އަބްދުލްހަންނާން އަބޫބަކުރު ހުށަހަޅުއްވާފައިވާ މީޑިއާ އެންޑް ބްރޯޑްކާސްޓިން ކޮމިޝަންގެ ބިލާ މެދު ސަރުކާރުން އަދި އެއްވެސް ގޮތެއް ނިންމާފައި ނުވާ ކަމަށް އޭޖީ ވިދާޅުވި އެވެ.
އެމްޖޭއޭ އާއި އެމްއެމްސީން ވަނީ މި ބިލާ ދެކޮޅަށް "ހަތަރެއްގެ ހައްގުގައި" ނަމުގައި ކެމްޕެއިނެއް ފަށައި، ބިލް މަޖިލީހުން ބޭރުކޮށްލުމަށް ގޮވާލައިފަ އެވެ. އަދި މިހާރު ވަނީ މި ބިލަކީ ނޫސްވެރިން ކޮންޓްރޯލް ކުރުމަށް ހުށަހަޅާފައިވާ ބިލެއްގެ ގޮތުގައި ސިފަކޮށް، ބިލް މަޖިލީހުން ބޭރުކުރުމަށް ގޮވާލާ ޕެޓިޝަނެއްގައި ސޮއިކުރަން ފަށާފަ އެވެ.
