ރައްޔިތުންގެ މަޖިލީހުގެ ރައީސް މިފަދައިން ވިދާޅުވީ ރައީސް ޑރ.މުހައްމަދު މުއިއްޒުގެ ސަރުކާރަށް 1 އަހަރުވުމާއި ގުޅިގެން ޕީއެސްއެމް ނިއުސްއިން ގެނެސްދިން "ހަފްތާ 52" ޕްރޮގްރާމުގައި ވާހަކަފުޅު ދައްކަވަމުންނެވެ.
އަބްދުލްރަހީމް ވިދާޅުވީ މި ސަރުކާރުގެ ފުރަތަމަ އަހަރު ވެސް ގިނަ ކާމިޔާބީތަކެއް ހޯދާފައިވާ ކަމަށާއި ކޮންމެ ކާމިޔާބަކީ އަތްލެވޭ އަދި ބައެއް ކާމިޔާބީތަކަކީ ލޮލަށް ފެންނަ އެއްޗެއް ނޫން ކަމަށެވެ. އޭގެތެރޭގައި ފައިސާ ޗާޕުކުރުން ހުއްޓާލުމާއި ރާއްޖޭގައި ތިބި އިންޑިއާ ސިފައިން ބޭލުން ފާހަގަކުރެއްވި އެވެ.
އަދި އެއްވެސް ސަރުކާރަކަށް ހުރިހާ ވައުދެއް އެއް އަހަރުތެރޭ ނުފުއްދޭނެ ކަމަށާއި އެކަމަށް ވަގުތު ނަގާނެއިރު، ރައީސް ޑރ. މުހައްމަދު މުއިއްޒު މިހާރުވެސް ގެންދަވަނީ ފަހަރަކު ކަމެއް ކުރައްވަމުން ކަމަށް އަބްދުލްރަހީމް ވިދާޅުވި އެވެ.
އަބްދުއްރަޙީމް ވިދާޅުވީ އަމާންވެއްޓެއް ގާއިމުކުރައްވާނެކަމަށް ރައީސް ވައުދުވެވަޑައިގެންނެވިކަމަށާއި އެ ވައުދުވެސް އެމަނިކުފާނު ފުއްދެވި ކަމަށެވެ. މިހުރިހާ ކަމަކީ ފާއިތުވި އެއްއަހަރަށް ބަލާއިރު ސަރުކާރަށް ހާސިލްކުރެވުނު މުހިންމު ކާމިޔާބީތަކެއް ކަމަށް ވިދާޅުވި އެވެ.
ރައީސް މުއިއްޒުގެ އެންމެ ބޮޑު އެއް ވައުދަކީ ގެދޮރުވެރިކަމުގެ ވައުދުކަން ފާހަގަކުރައްވަމުން އަބްދުލްރަހީމް ވިދާޅުވީ އެ ވައުދު ފުއްދުމަށްޓަކާ ރާއްޖޭގައި މިހާތަނަށް ހިންގޭ އެންމެ ބިޔަ ބޮޑު މަޝްރޫއު ކަމަށްވާ، ރަސްމާލެ މަޝްރޫއު ވެރިކަމަށް ވަޑައިގެން ކުޑަ ދުވަސްކޮޅެއްގެ ތެރޭގައި ފެއްޓެވި ކަމަށެވެ. އަދި އަންނަ އަހަރު ވެގެންދާނީ ރާއްޖޭގެ ތާރީހުގައި މިހާތަނަށް ތަރައްގީގެ މަޝްރޫއުތައް ނުހިނގާހާ ގިނަ އަދަދަކަށް މަޝްރޫއުތައް ހިންގާނެ އަހަރަކަށް ކަމަށްވެސް ވިދާޅުވި އެވެ.
ރައްޔިތުންގެ މަޖިލީހަކީ ސަރުކާރަށް ޖެއްސުންކުރާ މަޖިލީހަކަށްވެއްޖެނަމަ އަދި މަޖިލީހުގެ ރިޔާސަތުގައި އިންނަ މީހަކީ އަމިއްލަ ގޮތްތައް ގެންގުޅޭ މީހަކަށްވެއްޖެނަމަ ސަރުކާރަށް ބައެއް ކަންކަމުގައި ވަރަށް އުނދަގޫވާނެކަމަށްވެސް ވިދާޅުވިއެވެ.
އަބްދުއްރަހީމް ވިދާޅުވީ ބޭނުންފުޅުވަނީ ގޮންޖެހުންތަކާއި ކުރިމަތިލައިގެން ކަންކަން ހާސިލްކުރެއްވުމަށްކަމަށެވެ.
