ގާނޫނު އަސާސީއަށް އިސްލާހުތަކެއް ގެންނަން ރައްޔިތުންގެ މަޖިލީހަށް ހުށަހެޅީ، ސަރުކާރުގެ ފަރާތުން ހުޅުދޫ ދާއިރާގެ މެންބަރު މުހައްމަދު ޝާހިދުއެވެ.
މި ބިލްގެ ފުރަތަމަ ކިޔުން ހެނދުނު އިއްވުމަށްފަހު ޕީއެންސީގެ ސުޕާ މެޖޯރިޓީން ވަނީ ބިލު މަޖިލިހަށް ބަލައިގަނެފައެވެ. އަދި މުޅި މަޖލީހުގެ ކޮމެޓީއަށް މައްސަލަ ފޮނުވާ ދެ ގަޑިއިރުގެ ތެރޭގައި ބިލް ދިރާސާކޮށް ކޮމެޓީން ވަނީ ފާސްކޮށްފައެވެ.
ގާނޫނު އަސާސީއަށް ސަރުކާރުން ހުށައެޅި އިސްލާހުތައް
- މެމްބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭ ގޮތް ހެދުން
- ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުން
- ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ހެދުން
މި އިސްލާހުތައް ގާނޫނު އަސާސީއަށް ގެންނަ ފެންނަކަމަށް 78 މެމްބަރުން ވަނީ ވޯޓް ދެއްވާފައެވެ. ނުފެންނަކަމަށް ވޯޓް ދެއްވީ 13 މެމްބަރުންނެވެ.
މި އިސްލާހުތައް މަޖލީހުން ފާސްކުރީ އިދިކޮޅު އެމްޑީޕީގެ މެމްބަރުން މަޖިލީހުގައި އިހްތިޖާޖުކުރަމުން ދަނިކޮށެވެ.
ގާނޫނު އަސާސީއަށް ހުށައެޅި އިސްލާހު ފާސްވުމުން ސަރުކާރު މެމްބަރުން އުފާ ފާޅުކުރަނީ
މި ބިލް ފާސްކުރުމުގެ ބިލަށް ގަލޮޅު އުތުރު ދާއިރާގެ މެމްބަރުން މީކާއިލް ނަސީމް އިސްަލާހުތަކެއް ހުށައެޅުއއްވިއެވެ. އެހެންނަމަވެސް ޕީއެންސީގެ ސުޕާ މެޖޯރިޓީން ވަނީ އެ އިސްލާހުތައް ގެންނަން ނުފެންނަކަމަށް ވޯޓް ދީފައެވެ. މީކާއިލް ހުށައެޅުއްވި ރައްޔިތުންގެ މަޖިލީހުގެ މެންބަރުން މަގާމުން ވަކި ކުރުމުގެ ފުރިހަމަ ބާރު ސިޔާސީ ޕާޓީތަކަށް ދިނުމުގެ ބަދަލުގައި، އެ ބާރު ސީދާ މެންބަރުން ނިސްބަތްވާ ދާއިރާގެ ރައްޔިތުންނަށް ދިނުމަށެވެ.
މީކާއިލް ހުށައެޅުއްވި އިސްލާހުގައި ހިމެނޭ ނުކުތާތައް
- ސިޔާސީ ޕާޓީއެއްގެ މެންބަރެއްގެ ހައިސިއްޔަތުން ރައްޔިތުންގެ މަޖިލީހަށް އިންތިހާބުވެފައިވާ މެންބަރެއް އަމިއްލަ އިސްނެގުމަށް އިންތިހާބުވީ ޕާޓީއަކުން ނުވަތަ އެހެން ސިޔާސީ ޕާޓީއަކަށް ބަދަލުވުން.
- އަމިއްލަ ގޮތުން އިންތިހާބުވެފައިވާ މީހަކު ސިޔާސީ ޕާޓީއެއްގެ މެންބަރުކަމުން ވަކިވުން.
- އެ މީހަކު ރައްޔިތުންގެ މަޖިލީހަށް އިންތިހާބުވެފައި ވަނީ ސިޔާސީ ޕާޓީއެއްގެ މެންބަރެއްގެ ހައިސިއްޔަތުން ކަމަށްވެފައި، ޕާޓީގެ ނިންމުމާ ހިލާފަށް ރައްޔިތުންގެ މަޖިލީހުން، ނުވަތަ އެ މަޖިލީހުގެ ކޮމިޓީއެއްގައި ނިންމާ ނިންމުމެއްގައި ވޯޓު ދިނުމުގެ ސަބަބުން ނުވަތަ އެނޫން ވެސް ސަބަބަކަށްޓަކައި އެ ޕާޓީގެ އަސާސީ ގަވާއިދާ އެއްގޮތަށް، އެ އިންތިހާބުވި ދައުރުގެ ތެރޭގައި އެމީހަކު އެ ޕާޓީގެ މެންބަރުކަމުން ވަކިކުރާ ހާލަތެއްގައި، އޭނާ އިންތިހާބުވީ ދާއިރާގެ ވޯޓު ދިނުމުގެ ހައްގު ލިބިފައިވާ މީހުންގެ އަގުލަބިއްޔަތު އޭނާ އެ މަގާމުން ވަކި ކުރުމަށް ނިންމުން.
- މެންބަރަކު މަގާމުން ވަކި ކުރުމަށް، އެ މެންބަރަކު އިންތިހާބުވެފައިވާ ދާއިރާއަކަށް ވޯޓުލުމުގެ ހައްގު ލިބިފައިވާ ޖުމްލަ އާބާދީގެ ވަކި އިންސައްތައެއްގެ ރައްޔިތުން ސޮއިކޮށް ރައްޔިތުންގެ މަޖިޅިހަށް ހުށަހަޅާ ޕެޓީޝަނެއް ރައްޔިތުންގެ މަޖިލީހުގެ ކަމާބެހޭ ކޮމިޓީން ދިރާސާކޮށް، އެ މެންބަރަކު މަގާމުން ވަކި ކުރުމަށް އެ ދާއިރާގެ ވޯޓުލުމުގެ ހައްގު ލިބިފައިވާ އާބާދީގެ މެދުގައި އާންމު ވޯޓެއް ނެގުމަށް ނިންމައި، އެ ވޯޓުލާ މީހުންގެ އަގުލަބިއްޔަތުން އެ މެންބަރަކު މަގާމުން ވަކި ކުރަން ނިންމުން.
ޕީއެންސީގެ ސުޕާ މެޖޯރިޓީން މި ބިލު ފާސްކޮށްފައި މިވަނީ ގާނޫނުއަސާސީއަށް ގެނެވޭ އިސްލާހެއް ނުވަތަ ބަދަލަކީ ރައްޔިތުންގެ ބައިވެރިވުމާއި ހިޔާލާއެކު ފުޅާ ދާއިރާއެއްގައި މަޝްވަރާ ކުރެވިގެން ގެނެވޭ އިސްލާހުތަކަކަށް ވާންޖެހޭނެކަމަށް ބުނެ އެކަމުހައި ހިޔާލު ހޯދުމަށް ގާނޫނީ ވަކީލުން ހިމެނޭ ބާ ކައުންސިލުންވެސް ގޮވާލާފައި ވަނިކޮށެވެ.
