ބ. ކަމަދޫގައި އާ ޕޮލިސް ޕޯސްޓެއް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ކޮމިޝަނާ ވިދާޅުވީ ކަމަދޫއަކީ އިޖުތިމާއީ ގުޅުން ރަނގަޅު، ކުށްމަދު ރަށެއް ކަމަށެވެ. އަދި އެ ރަށުގައި ހުޅުވި ޕޮލިސް ޕޯސްޓަކީ ރަށުގައި އިތުރަށް ކުށް ވިޔަ ނުދިނުމަށް ފުލުހުންނާއި ރައްޔިތުން ގުޅިގެން މަސައްކަތް ކުރުމަށް ހުޅުވުނު ދޮރެއް ކަމަށް ވެސް ވިދާޅުވިއެވެ.
ކޮމިޝަނާ ވިދާޅުވީ މިހާރު ފުލުހުންގެ ހިދުމަތުން ރައްޔިތުންނަށް ހިދުމަތް ދިނުމުގައި އަމަލު ކުރާ މައިގަނޑު އަސާސަކީ މުޖުތަމައުގެ ރައްޔިތުންނާ ގުޅިގެން، ކުށް ވިޔަ ނުދިނުމަށް މަސައްކަތް ކުރުން ކަމަށެވެ. އަދި ކުށް އުފެދުމުގެ ކުރިން، ކުށް އުފެދުމަށް ހުރި ހުރަސްތައް ނައްތާލުމަށް މަސައްކަތް ކުރުމަށް އިސްކަން ދޭ ކަމަށް ވެސް ވިދާޅުވިއެވެ.
ކަމަދޫ ޕޮލިސް ޕޯސްޓު ހުޅުވުމުގެ ރަސްމިއްޔާތުގައި ކޮމިޝަނަރގެ އިތުރުން ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ އާއި ޑެޕިއުޓީ ކޮމިޝަނަރ އޮފް ޕޮލިސް އިސްމާއިލް ނަވީން އަދި ފުލުހުންގެ އެގްޒެކެޓިވް އޮފިސަރުންނާއި ކޮމިޝަންޑު އޮފިސަރުން ބައިވެރިވިއެވެ.
