އިމިގްރޭޝަނުން މިކަން އިއުލާން ކުރަމުން ބުނީ ކުޑަހުވަދޫން ޕާސްޕޯޓް ލިބޭނީ ކޮންމެ ހަފްތާއެއްގެ ހޯމަ ދުވަހު ކަމަށެވެ. އަދި ޕާސްޕޯޓަށް އެދި ހުށަހަޅާއިރު، ކަލެކްޝަން ޕޮއިންޓެއްގެ ގޮތުގައި ކުޑަހުވަދޫ އިހުތިޔާރު ކުރުމުން އެ ރަށުން ޕާސްޕޯޓް ލިބޭނެ ކަމަށް ވެސް އިމިގްރޭޝަނުން ބުނެފައި ވެ އެވެ.
އިމިގްރޭޝަން ކޮންޓްރޯލާ މުހައްމަދު ޝައްމާނު ވިދާޅުވި ގޮތުގައި މިހާރު ވެސް ރާއްޖޭގެ ހުރިހާ ސިޓީތަކުގެ އިތުރުން ހއ. ދިއްދޫން މި ހިދުމަތް ލިބެން ހުންނާނެ އެވެ. އަދި 2025 ނިމުމުގެ ކުރިން ރާއްޖޭގެ ހުރިހާ އަތޮޅަކުން ޕާސްޕޯޓް ލިބޭނެ އިންތިޒާމް ހަމަޖެއްސުމަކީ ސަރުކާރުގެ އަމާޒެއް ކަމަށް އޭނާ ވިދާޅުވި އެވެ.
މި ހިދުމަތް ކުޑަހުވަދޫން ލިބެން ފެށުމާ ގުޅިގެން އެ ރަށާއި އެ އަތޮޅުގެ ރައްޔިތުންނަށް ވަރަށް ބޮޑު ފަސޭހައެއް ވެގެންދާނެ އެވެ. މީގެ ކުރިން އެ ސަރަހައްދުގެ ރައްޔިތުން ޕާސްޕޯޓް ނަގަން މާލެ އަންނަން ޖެހުމަކީ ވަރަށް ބޮޑު ބުރައެއް ކަމަށް ވެފައި އޮތެވެ.
