މިނިސްޓަރު ޒަމީރު މިހެން މި ވިދާޅުވީ ކ. މާފުށީގައި ހައްޖު ކޯޕަރޭޝަނުން ހަލާލް ޓޫރިޒަމް ފަށަން ތައްޔާރުވަމުން އަންނަ ކަމަށް އެ ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް ވިދާޅުވެފައި ވަނިކޮށެވެ.
ރައްޔިތުން މަޖިލީހުގެ މެމްބަރަކު ކުރި ސުވާލަަކަށް ޖަވާނު ދެއްވަމުން ފިނޭންސް މިނިސްޓަރު މޫސާ ޒަމީރު ވިދާޅުވީ ހައްޖު ކޯޕަރޭޝަން ފަތުރިވެރިކަމުގެ ވިޔަފާރިއަށް ވަންނަން ނުޖެހޭކަމަށެވެ. އެގޮތުން އެދާއިރާގައި ވިޔަފާރި ކުރާނެ ކުންފުނިތައް ސަރުކާރުގައި އެބަހުރިކަމަށާއި ހައްޖު ކޯޕަރޭޝަން ގެސްޓް ހައުސް ހަދައިގެން ހިންގުމުން އެކަމުގެ ނަތީޖާ ރަނގަޅު ނުވާނެކަމަށް ޒަމީރު ވިދާޅުވިއެވެ.
ޒަމީރު ވިދާޅުވީ ހައްޖު ކޯޕަރޭޝަނާއި ފަންޑޭއް ހަވާލުކުރަނީ އެފަންޑު ބަލަހައްޓާ އެއިން ނަގާގައިގެން މީހުން ހައްޖާއި އުމްރާއަށް ފޮވުމަށްކަމަށެވެ. އެހެންކަމުން ގެސްޓް ހައުސް ހިންގަން ހައްޖުކޯޕަރޭޝަނުން މަސައްކަތް ކުރުން އެއީ އޭގެ ޒާތުގައި އެންމެ ފައިސާ ހުރި ގޮތްތޯ ކުންފުނީގެ ބޯޑުންނާއި ކުންފުނީގެ ހިއްސާދާރުން ވިސްނާލަން އެބަޖެހޭކަމަށެވެ.
ފިނޭންސް މިނިސްޓަރު ޒަމީރު މަޖިލީހުގައި ވާހަކަ ދައްކަވަނީ
ސަރުކާރުގެ މަސްއޫލިއްޔަތު އަދައިކުރާ މިންވަރު ބަލާ ކޮމިޓީގެ މިދިޔަ މަހުގެ 6 ވަނަދުވަހު ވާހަކަ ދައްކަވަމުން ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް ވިދަޅުވީ އެ ކޯޕަރޭޝަނުން މިހާރު މީހުން ފޮނުވަނީ ގެއްލުމުގައިކަމަށެވެ. އެވްރެޖްކޮށް ގާތްގަނޑަކަށް ލައްކައެއްހައި ރުފިޔާ ކޮންމެ ހައްޖުވެރިއަކަށް ހަރަދުކުރަން ޖެހޭކަން ފާހަގަކުރަމުން ޝަކީލް ވިދާޅުވީ ވިޔަފާރިތަކަށް އެ ކުންފުނިން އިންވެސްޓްކުރަން ނިންމައި، ބައެއް މަސައްކަތްތައް ކުރަމުން އަންނަކަމަށެވެ. އެގޮތުން ބޭރު ފައިސާ ހޯދަން މާފުށީގައި ގެސްޓްހައުސްއެއް ތަރައްގީކޮށް، ހަލާލް ޓޫރިޒަމް ތައާރަފުކުރަން ނިންމާފައިވާކަން ޝަކީލް ވަނީ ވިދާޅުވެފައެވެ.
